گوادر: پوجی کارمند ءِ کسانیں زھگے ءِ گوم ءَ جنسی زوراکی بگیری ءَ زھرشانی، سی پیک شھدگ بند

سربوتگیں ھالانی رِد ءَ بلوچستان ءِ تیاب دپی دمگ گوادر ءَ پاکستانی پوج ءِ کارمندے ءَ کسانیں زھگے ءِ گوم ءَ جنسی زوراکی کنگ ءِ جھد کتگ –

دمگی مردماں وئیل ءِ بگیری ءَ زھرشانی کنان ءَ سی پیک شھدگ بند کُتگ ءُ نندانک برجاہ انت –

زانگ بہ بیت اے اولی رند نہ انت چدوپیسر ھم بلوچستان ءِ تہ ءَ اے دابیں وئیل بوتگ انت –

چدوپیسر بیست ءُ یک اپریل سال دوھزار ءُ بیست ءُ یک ءَ بلوچستان ءِ دمگ کیچ ءَ پیرا ملٹری فورس ایف سی ءِ کارمندے ءَ کسانیں زھگ امیر مراد جنسی زوراکی ءِ نشانگ کُتگ ءُ آ بے ھوشی جاوراں چگل داتگ ات –

دمگی مردماں وئیل ءِ بگیری ءَ زھرشانی کنان ءَ ھوشاپ شھدگ بند کتگ ات –

زانگ بہ بیت بلوچستان ءِ تہ ءَ ننسانی ھکانی گل ءُ بلوچ راجدوست مدامی بلوچستان ءِ ایف سی، پیراملٹری فورس ءِ سر ءَ انسانی ھکانی لگتمالی ءِ الزام ءَ جنگ انت –

اشی ءَ ابید پاکستانی پوج ءِ سر ءَ مردمانی زورانسری آوار جنی ءُ آھانی کوش الزام ھم جنگ بوتگ ننت –