روکپتی بلوچستان: دگہ یک بندیگے پاھو دیگ بیتگ

روکپتی بلوچستان ءَ مروچی پاھو دیگ بیتگیں مردمانی کچ دو بیتگ اَنت –

گیشین ھالانی رد ءَ روکپتی بلوچستان ءِ بنجاھی شھر زاھدان ءَ ایرانی آمیدگس ءِ ھکم ءَ یک مردمے پاھو دیگ بیتگ-

پاھو دیگ بیتگیں مردم ءِ پجار سِی ءُ ھشت سالی ئیں نعمت اللہ ریگی پنام عبدالحمید رودینی ء حنیف ءِ نام ءَ زانگ بیتگ ءُ آئی ءَ وتی کھول ءَ شش زھگ ءُ یک زالے یل داتگ ءُ شتگ-

نعمت اللہ ریگی ایرانی سال نود ءُ ھپت ءَ ما اُستان فارس ءَ نشہ ءِ باپار ءَ دزگیر کنگ بیتگ ءُ پد ءَ آ زاھدان ءَ آرگ بیتگ ءُ بندیگ کنگ بیتگ-

ایران ءِ آشوبی دادگاہ ءَ آئی ءِ سر ءَ بستگیں جرم ءِ سر ءَ پاھو نامہ داتگ ءُ آ مروچی ماں زاھدان ءَ پاھو دیگ بیتگ-

اھوالانی رد ءَ نعمت اللہ ءِ سر ءَ پنچ ماہ ءَ پیش آشوبی دادگاہ ءَ پاھو ءِ ھکم داتگ بیتگ ءُ نعمت اللہ ریگی ءَ وتی سر ءَ جتگیں بھتام رد کنان ءَ وتی بھتامانی دور کنگ ءِ جھد کتگ بلے آ اے جھد ءَ بے سوب بیتگ-

زانگ بہ بیت روکپتی بلوچستان ءَ مردمانی پاھو دیگ ءِ درچ یکشل ءَ برجاہ اَنت مروچی اے دومی مردم اِنت کہ ایرانی آمیدگس ءِ ھکم ءَ پاھو دیگ بوگ ءَ اِنت چد ءُ پیسر ایرانشھر ءَ یک مردمے پاھو دیگ بیتگ-