بولان ءَ دژمن ءِ گوم ءَ میڑ ءَ دو سرمچار نمیران ءُ ھشت پوجی کارمند مرتگ انت – بی ایل اے

بلوچ لبریشن آرمی ءِ جارکش جیئند بلوچ ءَ وتی آفیشل ٹیلیگرام چینل ھکل ءَ شنگ کرتگیں درشان ءِ تہ ءَ گوشتگ کہ بولان ءَ زورگیریں پوج ءِ گوم ءَ میڑ ءَ بلوچ لبریشن آرمی ءِ دو سرمچار نمیران بوتگ انت ءُ وھدیکہ دیم پہ دیمی میڑ ءَ کم چہ کم ھشت پوجی کارمند مُرتگ ءُ بازینے زدگ بوتگ انت –

جیئند بلوچ ءَ وتی درشان ءِ تہ ءَ گوشتگ کہ بے سوب بوتگیں دژمن ءَ پیسر ءَ دزگیر کتگیں سَے بلوچ کُشتگ انت وھدیکہ اے دمگاں لس مردم نشانگ کتگ انت –

بلوچ لبریشن آرمی ءِ جارکش جیئند بلوچ ءَ میڑ ءُ لشکر کشی ءِ سرجمیں ھوال داتگ ءُ گوشتگ کہ پانزدھ روچاں برجاھیں میڑانی بندات ھپت اپریل دوھزار ءُ بیست ءُ سَے ءَ بولان ءِ دمگ سارو ءُ مچ ءُ کش ءُ گوری دمگاں بندات بوتگ انت اے میان ءَ دشمن پوج ءَ بازیں ھند ءُ دمگاں شیلنگ کنگ ءَ پد بالگردانی سر ءَ کمانڈو ایر گپتگ انت ءُ کُچ ءِ ھند ءَ ساڑی ایں بلوچ لبریشن آرمی تر ءُ گرد کنوکیں ٹولی ءَ جونی شوربندیانی رِد ءَ بازیں جاھاں سنگر بستگ ءُ دژمن پوج ءِ کمانڈوانی سر ءَ بازیں اُرشے کُتگ –

جارکش ءِ رِد ءَ اے میڑاں کم چہ کم ھشت دژمن کارمند مُرتگ ءُ بازینے زدگ بوتگ انت – سرمچارانی دست ءَ لٹ وارتگیں دژمن ءَ بے سوبی ءَ پد ءَ پیش ءَ آوار جنگ بوتگیں سَے بلوچ شھید کتگ انت ءُ آھانی جون ھمے دمگاں چگل داتگ انت وھدیکہ ھمے میان ءَ چہ مچ ءَ یک کھول ءِ داں پنچ روچاں بندیگ کتگ ءُ سارو ءِ کش ءُ گوری بازیں گِس ءِ مانداشتگ –

جارکش ءَ دیمتر ءَ گوشتگ جنگ ءِ دومی روچ ءَ دیم پہ دیمی میڑ ءَ بی ایل اے ءِ دو تمردیں سنگت غنی خان مری بلوچ پنام ءِ حسن روکی ءُ ولید پنام ءِ کمانڈو بہار نمیران بوتگ انت – نمیران بوتگیں سنگت غنی خان مری پنام ءِ حسن روکی ء روزی خان مری بولان ءِ دمگ یخو ءِ نندوک بوتگ ءُ آئی ءَ سال ءِ بیت کہ بلوچ لبریشن آرمی ءَ بندوک انت – آ یک ایماندار ءُ پہ دیمھونی دیگ ءَ چک ءُ پد نہ بوکیں سرمچار ءِ بوتگ –

جیئند بلوچ ءِ رِد ءَ دومی نمیران بوتگیں سنگت ولید پنام ءِ کمانڈو بہار ء محمد اقبال بلوچ تربت ءِ دمگ آپسر ءِ نندوک بوتگ – آ پہ راجی آجوئی جھد ءِ تہ ءَ وتی پرز ءِ پیلو کنگ ءَ سالے ءَ پیسر بی ایل ایل ءَ ھمگرنچ بوتگ – راجی زانت ءُ سنچ ءَ سر ریچیں سنگت ولید تمرد ءُ دلیریں سنگت ءِ بوتگ –

جارکش ءَ گڈسر ءَ وتی درشان ءِ تہ ءَ گوشتگ کہ بلوچ لبریشن آرمی کول کنت کہ ھر سنگر ءِ تہ ءَ دژمن ءَ گوں دلیری ءَ جنگ دئیں ءُ آئی ءَ بے سوب کن ایں –