تربت: نادراھجاہ ءَ اتکگیں زالبول ءِ ڈاکٹر ءِ ساڑی نہ بوگ ءَ بیران بوتگ

کیچ ءِ بنجاھی شھر تربت ءَ ٹیچنگ نادراھجاہ ءَ پہ الاج ءَ اتکگیں زالبول ءِ ڈاکٹر ءِ ساڑی نہ بوگ ءِ سوب ءَ بیران بوتگ –

گیشیں ھالانی رِد ءَ شمبے ءِ شپ ءَ ٹیچنگ نادراھجاہ تربت ءَ پہ الاج ءَ اتکگیں زالبولے ءِ اناگت ءَ جاور نگیگ بوتگ انت ءُ آئی ءِ بی پی بُرز شُتگ –

زالبول ءِ کھول ءِ مردماں پہ ڈاکٹر توار پر جنگ ءَ بازیں کوشست ءِ کُتگ بلے اھوالکار ءِ رِد ءَ نادراھجاہ ءَ ڈاکٹر ءِ ساڑی نہ بوگ ءِ سوب ءَ زالبول چہ مرگ ءَ رکینگ نہ بوتگ –

دومی نیمگ ءَ نادراھجاہ ءِ واکداراں زالبول ءِ بیرانی سر ءَ نادراھجاہ ءِ واکدارانی دلگوش نہ دیگ ءُ ڈاکٹر ساڑی نہ بوگ ءِ گپ رد کُتگ –

واکدارانی رِد ءَ زالبول شکری ءِ نادراہ ءِ بوتگ کہ نادراھجاہ ءِ آرگ ءَ پد دگہ نادراھجاھے ءَ برگ بوتگ ءُ ٹیچنگ نادراھجاہ ءَ یک سنئریں ڈاکٹری ءِ آسراتی ھم بوتگ انت –

زانگ بہ بیت ھمے سال ءِ فروری ماہ ءَ جنکویں نودربرے کہ آ ٹائیفائیڈ نادراھی ءِ آماچ بوتگ کہ آ تربت ٹیچنگ نادراھجاہ ءَ شری ءَ الاج نہ بوگ ءِ سوب ءَ بیران بوتگ ات – آ پہ تپ ءِ ھاتر ءَ ٹیچنگ نادراھجاہ ءَ آرگ بوتگ ات کہ آودا ھمے گوشگ بوتگ ات کہ آئی ءَ ٹائیفائیڈ انت بلے پدا ھم الاج نہ بوگ ءِ سوب ءَ کراچی ءَ برگ ءِ کوشست کنگ بوتگ بلے کراچی رسگ ءَ ساری بیران بوتگ ات –

زانگ بہ بیت بلوچستان ءِ گیشتریں مزنیں شھراِ جاندراھی ءِ آسراتی ءِ نہ بوگ ءِ سوب ءَ نادراھ دیم پہ کراچی ءَ برگ بنت کہ آھانی تہ ءَ گیشتر چہ نیم راہ ءَ بیران بنت –

بلوچستان ءِ دومی مستریں شھر تربت انت کہ اودا ھم جاندراھی ءِ آسراتی نہ بوگ ءِ ھساب انت کہ ادے ملیریا ءُ ٹائیفائیڈ نادراھ ھم کراچی ءَ برگ بنت –

زانگ بہ بیت بلوچستان ءِ ھستیں وھدے جانسلامتی ءِ وزیر احسان شاہ ءِ دمگ تربت ءَ ھوار بلوچستان ءِ ایندگہ دمگاں جانسلامتی جاور ھمے داب انت –