گلزار امام ءِ دزگیری: بلوچ راجی جُنز ءِ سر ءَ سان
ٹی بی پی شونگال
پاکستانی پوج ءِ لس سیادی تک (آئی ایس پی آر) ءِ رد ءَ پھازگی لشکریاں یک چیریں بیڑ ئِے تہ ءَ مزن مُلیں نشانگ گلزار امام پنام شمبے دزگیر کُتگ، گلزار امام آجوئی لوٹوکیں سلاہ بندیں گل بلوچ نیشنلسٹ آرمی ءِ ٹاھینوک ءُ مستریں کماندار اِنت۔ پاکستانی پوج گلزار امام ءِ دزگیری ءَ مزنیں سوبمندی ءِ رد ءَ پیش دارگ ءَ اِنت، وھدیکہ آئی ءِ گل ( بلوچ نیشنلسٹ آرمی ) ءِ گُشگ اِنت کہ گلزار امام چہ یک سالی ءَ پاکستانی پوج ءِ دزگیری ءَ بیتگ ءُ آ 3 مئی 2022 ءَ ترکی ءَ دزگیر کنگ بوتگ اَت۔
بلوچ نیشنلسٹ آرمی ءَ وتی درشان ءِ تہ ءَ ھمے تُرس ءِ گمان زاھر کُتگ کہ پاکستانی ڈیھ گلزار امام ءَ زوراکی ءِ آماچ کنگ ءَ گوں بلوچ راجی جُنز ءِ بگیرءَ کارمرز کنگ ءِ کوشست کُت کنت ءُ جُنز ءِ بگیری ءَ پندل سازی بندات کنت۔ پاکستان گلزار امام ءِ دزگیری ءَ پہ بلوچ جُنز ءِ ھاتر ءَ مزنیں تاوان ءُ ڈَکّ ءِ نامینگ ءَ اِنت ءُ پریس کار ھم دو دھکانی تہءَ اولی برءَ کجام ھم مَزن ملیں گوریلا کماندار ءِ دزگیری ءَ پہ پاکستان ءَ مزنیں سوبمندی ءِ نامینگ ءُ گُشگ ءَ اَنت کہ چریشی ءَ بلوچ آجوئی ءِ جھد ءِ سرءَ شپدیمیں سان کپ اَنت۔
پاکستان ءِ ھما پھازگی پریس کار کہ گلزار امام ءِ دزگیری ءَ گوں بلوچ راجی جُنز ءَ نزور بئیگ ءَ گوں یکجاہ کنگ ءَ اَنت، آ بلوچ راجی جُنز ءِ راجدپتری یکشلی ءَ چہ چم بندی کنگ ءُ تھنا یکیں وئیل ءَ زیرگ ءُ جُنز ءِ نزوری ءُ ھلاسی ءِ پیش گُشی کنگ ءَ اَنت۔ اے پیش گُشی نوکینے نہ اَنت بلکیں بیست ءُ یکمی کرناں بلوچ راجی جُنز ءِ بندات ءَ گوں یکشلی ءَ گوں کنگ بئیگ ءَ اَنت، جنرل پرویز مشرف ءَ گُشتگ اَت کہ تھنا سئے سردار ءُ لھتیں پراری کیمپ اَنت کہ اے زیت ھلاس کنگ بنت اِنت بلے دو دھکاں پد ھم بلوچ راجی جُنز پہ آجوئی ءَ وتی یکشلی برجاہ داشتگ۔
پیپلز پارٹی ءِ سرکار ءِ وھد ءَ پاکستان ءِ تھی کارانی وزیر رحمان ملک ءُ مسلم لیگ ءِ سرکار ءَ چوھدری نثار ءُ پاکستانی پوج ءِ جنرل ھم وھد پہ وھد بلوچ راجی جُنز ءَ گوں تاکت ءِ کارمرزی ءَ ھلاس کنگ گپ کنان بیتگ اَنت بلے بلوچ راجی جُنز ءِ ھلاس کنگ ءَ بے سوب بیتگ اَنت ءُ انیگیں لھتے سالانی تہ ءَ بلوچ جُنز ءَ بندوکیں سلاہ بندیں گلاں پاکستان ءِ تہ ءَ چین ءِ مپاد سرزاھری ءَ نشانگ کتگ اَنت کہ اے جُنز ءِ مھکم ءُ ھم تھر بیگ ءِ نَکش ءَ دنت۔
چہ اے گپ ءَ پجگ بوت نہ کنت کہ گلزار امام ءِ دزگیری ءِ سوب ءَ بلوچ جُنز ءِ سر ءَ شپدیمیں سانمندی کپ اَنت بلے آئی ءِ دزگیری ءَ چہ بلوچ جُنز نزور بیت کنت اے گپ اے دمان ءَ وھد ءَ پیش بیت پرچاکہ نواب اکبر خان بگٹی ، بالاچ خان مری، چئرمین غلام محمد ءُ اسلم بلوچ ءِ کُشگ ءَ پد ڈیھی ادارگ ءُ لھتے کواساں بلوچ جُنز ءِ ھلاس بئیگ ءِ پیش گُشی کُتگ اَت بلے انگت ھم بلوچ راجی آجوئی ءِ جُنز مھکمیں دروشم ءَ برجاہ اِنت۔
بلوچ راجی جُنز ءِ سری ءَ اگاں ایرت چاری ءَ گوں چمشانک ءِ دیگ بہ بیت گُڑا ما زانیں کہ بلوچ جُنز ادارگانی بنیات ءَ مھکم اِنت ءُ دانکہ بلوچ جیڑہ گیوار مہ بیت، بلوچ جُنز برجاہ مان ایت ءُ بلوچ سروکانی دزگیری اگاں کوشانی سانمندی المی ءَ بنت بلے جُنز ءِ یکشلی برجاہ مان اِیت۔