بلوچستان ءِ دمگ نصیرآباد ءَ پولیس پانگس فلیجی ءِ ھدبند ءَ ھپت سالی ئیں چکے ءِ گون ءَ زورانسری آورس ءِ جُھد کنگ بیتگ، ملامیں مردماں چُکے پِت اوں آوار جتگ۔
ھَندی مردمانی گوشگ ءِ در ءَ پولیس ملامیں مردمانی گون ءَ ھمراہ داری کنگ ءَ اِنت، چُک ءِ گریوگ ءُ زاریانی گوش داروک نیست ایں، چک ءِ مات ءُ برات جارکش ءِ دروشم ءَ بُرزی واکدار داں وتی توار ءِ سر کنگ ءِ ھاترا ماں پریس کلب سر بیتگ اَنت-
اے در ءَ گوٹھ کھیا، تھسیل چھتر ءِ جھمند شفیع محمد دیرکھانی گوں وتی مات ءِ ھمرائی ءَ ماں جارگس ءِ باسکاں گوں گپ ءُ تران کنان ءَ گشتگ کہ ملامیں خادم حسین، محمد صلاح، بدل خان، گل خان ءَ زورانسری منی ھپت سالی ئیں کسانیں گوھار شھربانو ءِ آروس ءَ گوں محمد صلاح کنگ لوٹ اَنت۔
تپلیں زھگ ءِ آورس نہ کنگ ءِ اِنکاری ءَ رند ملامیں مردم زورانسری لوگ ءَ پُترتگ اَنت ءُ توپنگ ءِ زور ءَ منی کماش محمد افضل دیر کھانی ءَ بیگواھی ءَ رند وتی ھمراھی ءَ برتگ ءُ انگت ءَ ھما مردمانی کبز ءَ انت، ایس ایچ او فلیجی ءِ گورا بیگواھی ءِ وئیل ءِ رپورٹ کنگ ءِ ھاترا شتگ اِنت آئی ءَ ملامیں مردمانی ھِلاپ ءَ اَمل کنگ ءِ اِنکار کتگ کہ اے مئے گون ءَ زلم ءُ زوراکی ءِ تانسر انت۔
آئی ءَ گشتگ کہ ھپت سالی ئیں بے گناہ چکے ئے ءِ گون ءَ زورانسری آروس کنگ بنی آدم ءِ اوبالانی تچِک ءَ لگت مال کنگ بوگ ءَ انت۔ ملامیں بلائیں سانے بوگ ءَ رند پولیس یک نیمگی چِک ءُ تان کنگ ءَ انت۔ پولیس مئے ھچ وڑیں انساپ دیگ ءَ نہ انت۔ ما گریب تبکیں گوش ایں ھمگرنچیں ءُ ملامیں مردم وتی تاکت ءِ زور ءَ مارا بیھار دیگ ءَ انت۔ آئی ءَ گشتگ ما کدی ھم وتی سر ءَ زلم ءُ زوراکی برداشت کت نہ کن ایں انساپ ءِ ھاترا ھرچ درے ٹُک این۔
چک ءِ مات ءَ گشتگ کہ منی چُک کہ آئی ءِ اُمر ھپت سال اِنت آ بالِگ نہ انت ءُ آئی ءِ آروس ھچ ڈول ءَ نہ بیت انت ما ھچ دروشم ءَ وتی چُک ءَ آئی دست نہ دائیں ءُ اے ڈولیں زلم ءُ زوراکی ھِلاپ ءَ توار چِست کن ایں۔
آئی ءَ گشتگ مئے لوٹ چہ واکدار اِنت کہ ملامیں مردمان زوت دستگیر بہ کنت ءُ کماش ءَ زوت آجو بہ کنت ءُ مارا انساپ دیگ بہ بیت انت البتہ مارا زھرشانی ءِ ھَک ءَ دار ایں۔