ھاش: بیگواھیانی ھلاپ ءَ زالبول ءُ زھگاں زھرشانی کتگ

روکپتی بلوچستان ءِ دمگ ھاش ءَ گوستگیں روچ ءَ زالبول ءُ زھگاں روکپتی بلوچستان ءَ دزگیر کنگ بیتگیں سیاسی رھشونانی دزگیری ءِ ھلاپ ءَ زھرشانی کتگ-

زھرشانی روانک ھاش ءِ ھند اسماعیل آباد کنگ بیتگ کہ اود ءَ زھرشانی روانک ءَ زالبول ءُ زھگاں بازیں کچے ءَ بھر زرتگ ءُ اوگام جنان ءَ بیگواھیں مردمانی یل کنگ ءِ لوٹ کتگ-

زھرشانی کنوکیں زالبولانی دستاں پلے کارڈ بیتگ اَنت کہ آیانی سر ءَ بیگواھیں مردمانی یل کنگ ءِ بارو ءَ نبشتگ بیتگ اَنت-

آیانی گوشگ اِنت ایرانی چیریں ادارھاں گوستگیں روچاں نیکراھی رھشون مولوی عبدالمجید مراد زئی دزگیر کتگ ءُ چریشی ءَ پد آئی ءِ بارو ءَ ھچ ھال نیست سرکار باید آئی ءَ یلو بہ کنت-

عبدالمجید مراد زاھدان ءِ مکی میست ءِ پیش امام ءُ روکپتی بلوچستان ءِ نیکراھی رھشون مولانا عبدالحمید اسماعیل زئی ءِ نزیکیں مردماں چہ یکے-

زانگ بہ بیت روکپتی بلوچستان ءَ مردمانی گرگ ءُ برگ ءُ بیگواہ کنگ ءِ درچ گوستگیں سال ءِ گڈسر ءَ بندات بیتگ کہ اے وئیلانی تہ ءَ گیشی گندگ بوگ ءَ اِنت –