منی گھار وڈیرہ ءَ زورانسری وتی گور ءَ داشتگ – پٹھان مری

بلوچستان ءِ دمگ کوھلو ءِ جھمنند پٹھان خان ء امیر مہندانی مری ءَ کوھلو ءِ پریس کلب ءَ گوں اھوالکاراں تران کنان ءَ گوشتگ کہ وڈیرہ گہرو مہندانی ءَ منی گھار زرگُل زورانسری وتی گور ءَ داشتگ ءُ گھار ءِ یل کنگ ءِ ھاتر ءَ وڈیرہ زر لوٹگ ءَ انت، من یک بزگریں مردمے آں منی گور ءَ گھار ءِ یل کنائینگ ءَ پہ زر نیست –

آئی ءَ گوشتگ کہ کانود جوڈ کنوکیں ادارہ منی گھار ءِ یل کنگ ءِ ھاتر ءَ وتی کرد ءَ پیلو بہ کن انت –

آئی ءَ گوشتگ کہ منی گھار ءِ اولی لوگواجہ ءَ آئی ءِ سون داتگ انت، سرداری رسم ءُ رواجانی رِد ءَ منی گھار وڈیرہ گہراو مہندانی ءِ گِس ءَ بوتگ، بلوچی شور ءُ سلاہ بوگ ءَ پد وھدیکہ من وتی گھار ءِ آرگ ءَ شتگ آں گڈا وڈیرہ گہراوں مہندانی ءَ منی گھار منی مناں نہ داتگ ءُ منی گور ءَ یک لک ءُ پنجاہ ھزار کلدار ءِ لوٹ کتگ – وھدیکہ من گوشتگ کہ من گریبیں مردمے آں منی گور ءَ زر نیست گڈا وڈیرہ زھر گپتگ ءُ گوں وتی زھگاں ھوار مناں جتگ ءُ ترسینتگ ءُ منی گھار ھم جتگ –

آئی ءَ گوشتگ کہ منی گھار منی چمانی دیم ءَ لٹ شاپ کنگ ءُ کوٹی ءِ تہ ءَ بند کنگ بوتگ ءُ منی بیھار داتگ کہ ترا پولیس ءِ دست ءَ دزگیر کنائین ایں –

آئی ءَ گوشتگ کہ من اشی ءَ پیش پولیس ءِ گور ءَ ارزی داتگ بلے ھچ وڈیں گامگیج زورگ نہ بوتگ –