بلوچستان: لین ءِ نیستی ءِ بگیری ءَ زھرشانی، کراچی تاں شال ءَ رؤکیں شھدگ بند

بلوچستان ءَ بازیں لوڈشیڈنگ ءِ بگیری ءَ دھکان کاراں زھرشانی کتگ –

شال تاں کراچی ءَ رؤکیں شھدگ بازیں جاھاں بند کنگ بوتگ چریشی ءِ سوب ءَ بازیں مال کش ، مساپر بروکیں گاڑی اشتاتگ انت، ھردو نیمگاں دگ بند انت ءُ گاڑیانی لین لگ اِتگ –

گیشیں ھالانی رِد ءَ بلوچستان ءَ بازیں لوڈ شیڈنگ ءِ بگیری ءَ دھکان کاراں کلات ءَ منگچر ءَ شھدگ بند کتگ انت –

درنگاز کنوکاں گوشتگ کہ کیسکو دھکان کاراں بیست ءُ چار ادارانی تہ ءَ بس دو ادار لین دنت، آھانی گوشگ ات کہ لین ءِ بازیں لوڈ شیڈنگ ءَ کشار تباہ بوگ ءَ انت –

دومی نیمگ ءَ کلات ءَ ھم دگ بند کنگ بوتگ ءُ چریشی ءَ ھردو نیمگاں گاڑیانی لین لگ اِتگ بازیں مساپر ءِ پس اِتگ –

چہ مستونگ ءَ سربوتگیں ھالانی رِد ءَ دھکانکار گلانی نیمگ ءَ بیست دو ادارانی لین ءِ لوڈ شیڈنگ ءِ بگیری ءَ بلوچستان ءِ ایندگہ دمگاں ھوار مستونگ ءَ ھم زھرشانی کنگ بوگ انت ءُ شھدگ بند کنگ بوگ انت –

دھکانکاراں شال تاں کراچی، شال تاں رؤکیں شھدگ لکپاس ءُ نوشکی کراس ءَ بند کتگ انت وھدیکہ دھکانکاراں شال ءُ سندھ ءِ مزن شھدگ دشت گونڈین ءَ بند کتگ –

گڈی ھالاں تاں گیشتریں جاھاں شھدگ ھنگت بند انت – سرکار ءُ زمیندارانی میان ءَ گند ءُ نند بے سوب بوتگ انت –