بلوچستان ءِ کیچ دمگ ءِ تمپ ھنکین ءَ چہ سیزدہ سال پیسر بیگواہ بیتگیں وھاب بلوچ ءِ مات فہمیدہ بلوچ ءَ کراچی ءَ برجاھیں بیگواھیں بلوچانی یل کنائنگ ءِ ھاترءَ برجاھیں وائس فار بلوچ مسنگ پرسنز ءِ شُد ھڑتالی بنجل ءَ اَتکگ ءُ وتی چک ءِ یل کنائنگ ءِ ھاترءَ دزبندی کُتگ ءُ گُشتگ کہ آئی چُک سیزدہ سال پیسرءَ دگہ مردمانی پجیگ ءَ دزگیر کنگ ءَ پد بیگواہ کنگ بیتگ اَت، زھگ ءَ گوں ھوار بیگواہ بیتگیں دگہ مردم یل کنگ بیتگ اَنت بلے وھاب سیزدہ سالاں پد ھم یل کنگ نہ بیتگ۔
آئی ءَ گُشتگ کہ وھاب بلوچ ھشت مارچ دو دو ھزار دہ ءَ دزگیر کنگ بیتگ اَت چہ آئی ءِ بیگواھی ءَ پد یو این ءَ ھوار درستیں ڈیھی ءُ میان اُستمانی ادارگاں چہ دزبندی کُتگ کہ آ وھاب بلوچ ءِ یل کنائنگ ءِ ھاترءَ وتی کردءَ پیلو بہ کن اَنت، البت ھمک جاہ ءَ بے امیتی ءَ ابید مارا ھچ نہ رستگ۔
آئی ءَ گُشتگ پاکستان ءَ آمید گِس ھست اَنت اگں وھاب جرمکار اِنت گُڑءَ آئی ءَ آمید گِس پیش کنگ بہ بیت، کم چہ کم مارءَ اَے گُشگ بہ بیت کہ آئی ءَ کجام ھما مزنیں جرمکاری ءِ کُتگ آ سیزدہ سالاں داں بیگواہ کنگ بیتگ۔
آئی ءَ گُشتگ کہ وھدے عبدالوھاب دزگیر کنگ بیتگ اَت آ نھمی مکتب ءِ نودربر بیتگ آئی بیگواھی ءَ پد مئے لوگءِ درستیں وشی مُرتگ اَنت ءُ پہ مارا وشیانی روچ ھم گمانی روچ جوڑ بیتگ اَنت۔
آئی ءَ ڈیھی ءُ میان اُستمانی ادارگاں چہ دزبندی کُتگ کہ وھاب بلوچ یل کنائنگ بہ بیت دانکہ مارءَ تورناکیں ودارءَ چہ آجوئی رست بہ کنت ءُ مئے زندمان ءَ وشی پدءَ واتر بہ بنت۔
زانگ بہ بیت بلوچستان ءَ استانی ادارگانی دستءَ مردمانی بیگواہ کنگ ءِ جیڑہ ءَ یک سنگینیں جاورھالی ءِ دروشم زُرتگ۔
یک نیمگ ءِ کہ ھمودءَ گوستگیں یک دھک ءَ چہ گیشترءِ وھد اِنت کہ بیگواھیں مردمانی یل کنائنگ ءِ ھاترءَ زھرشانی بنجل ماما قدیر ءِ مستری ءَ جُنزگ ءَ اِنت ھمودءَ دومی نیمگ ءَ بلوچستان ءَ ڈن جتاھیں بلوچ سیاسی گل ءُ پاٹیانی نیمگ ءَ ھم بیگواھیں مردمانی یل کنائنگ ءِ ھاترءَ زھرشانی ءُ سرپدی کمپین جُنزینگ بنت۔