بارکھان ءَ مات ءُ زھگانی ناگتی کوش ءَ کوشکار سردار کھیتران کَے اِنت؟

گوستگیں روچ ءَ بلوچستان ءِ دمگ بارکھان ءِ ھند ھاجی کوٹ سَے لاش دزکپتگ، پولیس ءِ رد ءَ یک چاتے ءِ توک ءَ دو مردین ءُ یک زالبولے ئیگ اَنت-

پولیس ءَ ھر سئیں مردمانی لاش پجاری ءِ ھاتر ءَ سینٹر ءَ برگ بیتگ اَنت اود ءَ بلوچستان ءِ دمگ دکی ءِ جھمنندیں ھان مھمد مری ء نبی بخش گزینی مری ءَ لاشانی پجار آئی ءِ لوگ بانک گران ناز، مستریں زھگ مھمد نواز ءُ دومی زھگ عبدالقادر ناماں زانگ بیتگ اَنت-

ھان مھمد مری کشگ بیتگیں زالبول ءِ لوگ واجہ ءُ زھگانی پت اِنت، دمگی رسانکدرانی رد ءَ آئی ءِ کھول ءِ ھشت مردم سال دوھزار ءُ نوزدہ ءَ سردار عبدالرحمان کھیتران ءُ آئی ءِ سلاہ بنداں آئی ءِ لوگ ءَ چہ زورانسری آوار جتگ ءُ گوستگیں چار سالاں وتی بندیگ جاہ ءَ آئی ءَ آئی ءِ لوگ بانک ءُ زھگ ھوار اَنت-

آئی ءَ جنوری دوھزار ءُ بیست ءُ دو ءَ دی بلوچستان پوسٹ ءَ دیم داتگیں یک درشانے ءَ ھان مھمد مری ءَ پدر کرتگ آ وتی برات بیگواھیں برات ءِ شوھاز ءَ کمک ءِ پژدر ءَ سردار عبدالرحمان کھیتران ءِ گون ءَ نگھپانی ءِ واستا کار ءَ لگ اَنت بیت ءُ گمان ءَ سال دوھزار ءُ چاردہ ءَ یک کیسے ءَ ڈیوٹی ءِ وھد یَ پیش اتکگ دزگیر بیتگ ات-

ھان مھمد مری ءِ رد ءَ مارچ دوھزار ءُ نوزدہ ءَ جیل ءَ یل بیگ ءَ پد وھدیکہ لوگ ءَ شتگ انت گڑا سرپدی بیتگ کہ عبدالرحمان کھیتران ءِ کارمنداں سردار ءِ گوشگ ءَ منی لوگ ءِ ھچت مردم آیانی توک ءَ منی لوگ بانک گران ناز، جنک فرزانہ، بیٹے عبدالستار، عبدالغفار، محمد عمران، مھمد نواز، عبدالمجید ءُ عبدالقادر ءِ آوار اش جتگ ءُ ھمے وڑ ءَ منی لوگ ءِ ساز ءُ سامان اش ھم برتگ اَنت-

ھان مھمد مری ءَ اے ھال راست کتگ گوستگیں روچاں آئی ءِ لوگ بانک ءُ زھگانی لاش دزکپتگ اَنت ءُ داں انگت ءَ آئی ءِ کھول ءِ مردم ءُ زھگ استانی وزیر ءِ زندان بندیگ اَنت-

سردار عبدالرحمان کھیتران کے اِنت؟

عبدالرحمان کھیتران بلوچستان اسمبلی ءِ انیگیں اُستانی وزیر مواسلات ءُ سرکاری پاٹی بلوچستان عوامی پارٹی ءِ جارکش ءُ وتی ٹک ءِ سردار اِنت ءُ آئی ءِ سر ءَ ھان مھمد مری ءِ کھول ءِ آوار جنگ ءُ کوش ءِ بھتام اِنت-

ریاستی ادارھانی نامگپتی سروکی ءَ شپ ءَ جوڑ بیتگیں ءُ سرکار ءَ ھوار بیتگیں پاٹی بلوچستان عوامی پارٹی ءِ رھشون سردار عبدالرحمان کھیتران ءِ وتی جیل ءِ ھلائینگ ءُ زالبولانی زھگانی بندیگ کنگ ءِ بھتام یکشل ءَ جنگ بیتگ اَنت کہ اود ءَ سال دوھزار ءُ چاردہ ءَ بارکھان پولیس ءَ سردار عبدالرحمان کھیتران ءُ آئی ءِ ھمراھانی ھلاپ ءَ بیڑ بران ءَ آئی ءِ بنجل ءِ سر ءَ بیڑ برتگ ءُ آئی ءِ دزگیر کنگ ءَ ھوار آئی ءِ جیل ءَ چہ یک زالبولے ءَ ھوار پنچ مردم یل کنائینتگ اَنت-

داں گڈسر ءَ دوھزار ءُ نوزدہ ءَ شال ءَ ایڈیشنل سیشن جج ءَ آمید گس ءَ وتی جیل ءِ جوڑ کنگ ءُ آوارجنیانی سر ءَ اُستانی وزیر سردار عبدالرحمان کھیتران ءُ آئی ءِ زھگ ءُ ھمراہ یل داتگ اَنت – گمان چوش گوشگ بیتگ کہ بلوچستان ءَ ھما وھد ءُ وزیر وردنی سردار عبدالرحمان کھیتران ءَ آئی ءِ زھگ ءُ ھمراھاں بازیں کچے ءَ جنوری دوھزار ءُ چاردہ ءَ بارکھان ءَ وتی جیل ءَ مردم لٹ ءُ کُٹ ءُ بندیگ کنگ ءِ بھتام بیتگ اَنت-

ھمے رنگ ءَ بیست ءُ سَے جولائی دوھزار ءُ بیست ءَ بارکھان ءِ ھند نھر کوٹ ءِ نزیک ءَ سردار کھیتران ءِ سلاہ بندین مردماں دممگی اھوالکار انور جان کھیتران ءِ سر ءَ تیرگواری کتگ ءُ کُشتگ ءُ آئی ءِ برات ءِ سر ءَ بھتام بیتگ کہ آئی ءِ برات ءَ استانی وزیر ءِ زلمانی ءُ کرپشن ءِ ھلاپ ءَ چاگردی رسانکجاھاں ھالانی تالان کنگ ءِ پژدر ءَ کشتگ-

اھوالکار انور جان کھیتران ءِ کوش ءِ ھلاپ ءَ سرجمیں بلوچستان ءَ انسانی ھکانی گل ءُ دگہ گلاں زھرشانی کتگ ات چریشی ءَ پد اھوالکار ءِ کوش ءَ ھواریں استانی وزیر ءِ نگھپان دزگیر کتگ ات-

سال دوھزار ءُ بیست ءُ یک ءَ عبدالرحمان کھیتران ءِ زھگ شال ءَ تیرگواری ءِ آسر ءَ زدگ بیتگ ات – شال ءَ آئی ءِ زھگ میجر تاھر ءُ پشتون تاجر ءَ زمین ءِ جیڑہ ءِ سر ءَ بیتگ ات ءُ چریشی ءَ استانی وزیر ءِ زھگ ءِ گاٹ ءِ تیرگواری ءَ سَے تاجر بیران بیتگ ات اَنت-

اُستانی وزیر عبدالرحمان کھیتران ءُ آئی ءِ زھگ ءَ پاکستانی پوج ءِ نزیکیں مردم مارگ بنت ءُ آیانی سروکی ءَ یک ڈیتھ اسکواڈ نامیں گلے ءِ ھلائینگ ءَ کہ اے گل بلوچستان ءَ آجوئی دوستیں گل ءُ ایانی پلامرزی کنوکانی سر ءَ دیمپانی کنگ ءِ واستا جوڑ کنگ بیتگ – عبدالرحمان ءِ زھگانی توک ءَ یک زھکے لیفٹینٹ کرنل تاھر شاہ کھیتران اِنت ءُ آ یک کلانین آپیسرے ءُ آئی ءِ دومی زھگ سرجم ءَ بارکھان ءَ ھواریں دمگاں پاکستانی پوج ءُ کشمیر یکجھتی ءَ روانک کش ات اِنت-

سردار عبدالرحمان کھیتران اولی رند ءَ سال دوھزار ءُ شش ءَ دو کسانیں جنکانی زورانسری آروس دیگ ءِ پژدر ءَ زندانی کنگ بیتگ بلے ھروھد ءَ آ وتی تاکت ءِ زور ءَ یک کنگ بیت اِنت -سردار عبدالرحمان کھیتران یک رندے پد ءَ ھان مھمد مردی ءِ کھول ءِ کوشکار ءُ شال ءَ سر وزیر ءِ گس ءِ دیم ءَ آئی ءِ ھلاپ ءَ نندوکیں مردم آئی ءِ دزگیری ءِ لوٹ ءَ کنگ ءَ اَنت-

بارکھان ءِ وئیل ءَ مھلوک ءِ نیمگ ءَ ترندیں زھرشان برجاہ اَنت ءُ ایشی ءِ پژدر ءَ جے آئی ٹی ھم نامینگ بیتگ-

دومی نیمگ ءَ سردسر کھیتران ءِ زھگ ھم آئی ءَ چہ رنجش ءِ سبب ءَ انعام کھیتران ءَ گوشتگ کہ مری ٹک ءِ بازیں زھگ ءُ زالبول سردار عبدالرحمان کھیتران ءِ زندان ءَ بندیگ اَنت ءُ آئی ءِ پس ءَ سرکار ءِ پلامرزی گون اِنت-

دومی نیمگ ءَ گوستگیں شپ ءَ پولیس ءَ بند ءُ ساچی وزیر عبدالرحمان کھیتران لوگ ءِ سر ءَ بیڑ برتگ ءُ پولیس ءِ رد ءَ آئی ءِ بنجلانی سر ءَ پٹ ءُ پول برجاہ اَنت ءُ پٹیل باگ ءَ ھم آئی ءِ بنجل ءِ سر ءَ روکیں دراھیں راہ بند کنگ بیتگ اَنت-