روکپتی بلوچستان ءَ دو بندیگیں ورنایانی سر ءَ پاھو دیگ ءِ ھکم

روکپتی بلوچستان ءَ زھرشانی ءِ وھد ءَ دزگیر بیتگیں دو ورنایانی سر ءَ پاھو دیگ ءِ ھکم اتکگ –

سر بیتگیں اھوالانی رد ءَ روکپتی بلوچستان ءِ تیابدپی شھر چھبار ءَ دزگیر بیتگیں منصور ھوت ء ملا کمالان ھوت ءُ نزام ھوت ء لال مھمد ءَ ایرانی آمیدگس ءَ پاھو دیگ ءِ ھکم داتگ اَنت –

ھالانی تہ ءَ گوشگ بیتگ کہ ھردوکیں ورنایانی سر ءَ ڈیھ ءِ ھلاپ ءَ برانزگرگ ءُ مھلوک ءِ دل ءُ لاپاں ڈیھ ءِ زھر درشانگ ءِ پژدر ءَ شھید موسیٰ نوری آمیدگس ءَ ھردوکاناں مرگ ءِ سزا دیگ ءِ ھکم داتگ –

بیست ءُ ھپت سالی ئیں منصور ھوت ء بلوچ کلاسیکل گشندہ ملا کمالان ءِ زھگ ءُ بیست سالی ئیں ورنا نزام الدین ھوت ء لال مھمد ھردوک چھبار ءِ نندوک اَنت –

اھوالانی تہ ءَ گوشگ بیتگ کہ منصور ھوت ءُ نزام ھوت ایرانی چیریں ادارھاں جتگ ءُ آیانی سر ءَ جتگیں جرم منیتگ اَنت-

ھالانی تہ ءَ گوشگ بیتگ کہ ایرانی شاک بسیج ءَ ھردوکیں ورنایانی مرگ ءِ سزا ءِ نہ دیگ ءِ زبان کتگ بلے ایشی ءَ ابید ھم ھردوکانی سر ءَ کڈنی پاھو دیگ ءِ ھکم دیگ بیتگ-

زانگ بہ بیت منصور ھوت گوستگیں سال ءِ دو اکتوبر ءُ نزام سِی ستمبر ءَ ماں چھبار ءَ بلوچ جنک ماھو بلوچ ءِ گون ءَ بیوکیں زوراکی ءِ ھلاپ ءَ بیوکیں زھرشانی ءِ وھد ءَ دزگیر کنگ بیتگ اَنت-

زانگ بہ بیت چریشی ءَ پیش ھژدہ سالی ئیں ورنا شعیب میر بلوچزئی ریگی، کمبیز خروت، ابراھیم ناروی ءُ منصور دھمردہ ھم ایرانی آمیدگس ءَ مرگ ءِ سزا دیگ ءِ ھکم داتگ ات اَنت ءُ چریشی ءَ ایرانی ایمنسٹی انٹرنیشنل ءَ اے ورنایانی مرگ ءِ سزا دیگ ءِ دارگ ءِ کڈنی کتگ ات –