بلوچ زالبول ءِ زورانسری آوار جنی درگت ءَ سیاسی ءُ چاگردی باسکانی پژدر

بلوچ زالبول ماھل بلوچ ءِ وش ءُ سلامتی ءِ یل کنائینگ ءِ ھاتر ءَ ھر تک ءُ پھناتاں سیادی داروکیں مردم توار چست بہ کن انت – وی بی ایم پی

چہ شال ءَ بلوچ زالبول ماھل بلوچ ءِ زورانسری آوار جنی ءِ بگیری ءَ ھر تکاں سیادی داروکیں سیاسی ءُ چاگردی باسک وتی زھرانی درشانی ءَ کنگ ءَ انت ءُ میان استمانی ھکانی گلاں گوں لوٹ کنگ انت کہ بلوچ زالبول ءُ زھگانی زورانسری آوار جنی ءِ بگیری ءَ گامگیج بہ زور انت –

بلوچ زالبول ماھل بلوچ دوشی شپ شال سیٹلائٹ ٹاؤن ءَ بلوچستان شھدربرجاہ ءِ نزیک ءَ چہ وتی جند ءِ گِس ءَ گوں زھگاں زورانسری آوار جنگ ءُ بیگواہ کنگ بوتگ وھدیکہ پدا رند ءَ آئی ءِ زھگ یل کنگ بوتگ انت بلے آئی ءِ جند ھنگت بیگواہ انت –

اے درگت ءَ بیگواھیں مردمانی پانکجنیں گل وائس فار بلوچ مسنگ پرسنز سرکماش نصراللہ بلوچ ءَ گوشتگ کہ گل ءِ گور ءَ اے ھال سر بوتگ کہ گوستگیں شپ ءَ شال ءِ دمگ سیٹلائٹ ٹاؤن ءَ ماھل بلوچ پاکستانی پوج ءَ زورانسری آوار جتگ ءُ بیگواہ کتگ کہ باز پدردی گپ یے کہ ما اشی ءَ ترندی ءَ گوں ایر جن ایں –

آئی ءَ چہ سرکار ءَ لوٹ کتگ ءُ گوشتگ کہ بلوچ زالبول ءِ زورانسری آوار جنی ءَ زوت گامگیج بہ زوریت ءُ آئی ءَ وش ءُ سلامتی یل بہ کنت –

نصراللہ بلوچ ءَ گوشتگ کہ بلوچ زالبول ماھل بلوچ ءِ وش ءُ سلامتی یل کنائینگے ھاتر ءَ ھر تک ءُ ہھناتاں سیادی داروکیں مردماں توار چست کنگی انت –

چہ شال ءَ ماھل بلوچ ءِ زورانسری آوار جنی ءِ درگت ءَ بلوچستان ءَ ھوار جھان ءِ کنڈ کنڈ ءَ نشتگیں سیاسی باسک اے وئیل ءِ درگت ءَ وتی زھرانی درشانی ءَ کنگ ءَ انت – وھدیکی بلوچ وومن فورم ءَ اشی ءِ بگیری ءَ باند ءَ شال ءَ زھرشانی ءُ روانک کشگ ءِ جار جتگ –

اے درگت ءَ بلوچ نیشنل مومنٹ ءِ سرکماش ڈاکٹر نسیم بلوچ ءَ چاگردی ترامجاہ ٹویٹر ءَ وتی ٹویٹ ءِ تہ ءَ نبشتگ کہ ملک ناز، نورجان، رشیدہ زھری ءُ دگہ بازیں مردماں پد پاکستانی پوج ءَ یک دگہ بلوچ زالبول ءِ آوار جتگ –

آئی ءَ گوشتگ کہ گوستگیں شپ ءَ ماھل بلوچ چہ شال ءَ زورانسری آوار جنگ ءُ بیگواہ کنگ بوتگ، کہ آ بی این ایم ءِ رھشون ھدامرزی واجہ محمد حسین نشار انت – بی این ایم ءِ سرکماش ءَ درسیں مردماں چہ دزبندی کتگ کہ اے زوراکی ءِ بگیری ءَ توار چست بکن انت –

بلوچ نودربر رھشون ڈاکٹت ماھرنگ بلوچ ءَ گوشتگ کہ بلوچ زالبول ریاستی زوراکیانی آماچ انت – ھمک روچ بلوچ زالبول زورانسری آوار جنگ ءُ بیگواہ کنگ بوگ ءَ انت – گوستگیں شپ ءَ یک دگہ بلوچ زالبول ءِ ماھل بلوچ سی ٹی ڈی ءَ چہ جندے گِس ءَ آوار جتگ ءُ بیگواہ کتگ – کہ اے رستری ءُ زوراکی ءِ گڈی سیمسر سرگوز کنگ انت اشی ءِ بگیری ءَ ھچ نگوشگ مارا گار کنت –

آئی ءَ گوشتگ کہ ماھل بلوچ وتی دو چورویں زھگانی سھارہ انت آئی ءِ زھگانی دیم ءَ سرجمیں شپ ءَ آ لٹ شاپ کنگ بوتگ، آئی ءَ آہ ءُ سلوات کتگ کہ آئی ءِ گناہ چی انت بلے اے زالماں آئی ءِ زھگانی سر ءَ ھم رھم نہ کتگ –

بلوچ اسٹوڈنس ایکشن کمیٹی ءِ سرکماش ڈاکٹر صبیحہ بلوچ ءَ گوشتگ کہ بنگلہ دیش ءِ گوستانک دوبر کنگ بوگ ءَ انت، دستگوشیں مردم جنگ نیاما برگ بوگ ءَ انت –

آئی ءَ گوشتگ کہ ماھل بلوچ ءِ آوار جنی ھچ وڈ اوپار کنگ نہ بیت – میان استمانی ادارہ راج ءِ رکینگ ءَ وتی کرد ءَ پیلو بہ کن انت – گرانھادی ءُ ناشرکاریاں راج پُرسیت کہ ریاست کجا انت؟ آھانی ھاتر ءَ جواب ایش انت کہ ریاست ادا انت کہ آئی ءِ گور ءَ دگہ ھچ کار نیست بید بلوچانی سر ءَ زلم زوراکی کنگ ءَ –

آئی ءَ گوشتگ کہ رشیدہ بلوچ ءَ پد ماھل بلوچ ءِ آوار جنی اے گپ ءَ پدر کنت کہ ریاست ءِ درساں مستریں جیڑہ بلوچ ءِ پجار انت –

نیشنل ڈیموکریٹک پاٹی ءِ بنجاھی انفارمیشن سیکٹری زید ارشاد ءَ گوشتگ کہ 1973 کانود ءِ پاسدارء کنوکاں ماھل بلوچ ءُ آئی ءِ زھگ زورانسری آوار جتگ انت زھگ پدا یل داتگ انت بلے ماھل ھنگت بیگواہ انت – ھمے سما بیت کہ بلوچ زالبول یک درچ ءِ گوم ءَ نشانگ کنگ بوگ ءَ انت نفسیاتی جنگ ءِ بوگ ءَ انت بلے آھاں پھمگ لوٹیت کہ اشی ءِ تاوانانی دیمپانی ءَ ایوک ءَ بلوچ نہ کنت –

سرملک ءَ نشتگیں بلوچ راجداریں باسک حکیم بلوچ ءَ اے وئیل ترندی ءَ گوں ایرجتگ ءُ گوشتگ کہ بلوچ زالبولاں زورانسری آوار جنگ، آھاں جنگ آھانی کمشرپی کنگ ءَ اگاں ریاست ھمے پھمیت کہ بلوچ راجی زرمبشت نزور کنت گڈا راستی ھمیش انت کہ ریاست اھمکانی جنت ءَ انت اے وڈیں وئیل بلوچ گھگیری ءَ چدوگیشتر ترندی آرگ ءِ سوب جوڈ بنت –

انسانی ھکانی باسک حمیدہ نور ءَ گوشتگ کہ زالبولانی زورانسری آوار جنی ءِ نوکیں درچ ءِ بندات کنگ بوتگ کہ اشی ءِ سر ءَ پاکستان ءِ فیمنسٹانی ھچ نگوشگ پدردی یے –

زانگ بہ بیت گوستگیں سال ءَ کیچ ءِ یک زالبول نورجھان ءِ زورانسری آوار جنی ءَ پد آئی سر ءَ ھنچیں وتگڑیں الزام ءِ جنگ بوتگ ات کہ پد ءَ رند ءَ بازیں زھرشانی ءُ روانکاں پد آ زاھر کنگ بوتگ ات وھدیکہ آئی ءِ سر ءَ جنگ بوتگیں الزام راست کنگ نہ بوتگ اتاں ءُ.پدا یل کنگ بوتگ ات –