بلوچستان : پاکستانی پوج ءِ لَٹ ءُ کُٹاں چہ یک مردمے بیران ءُ چار بیگواہ کنگ بیتگ

بلوچستان ءَ پاکستانی پوج دگہ چار مردم زورانسری آوار جنی ءِ نشانگ کتگ اَنت وھدے کہ بندیگیں مردمے ءِ لَٹ ءُ کُٹیں لاش دزکپتگ-

بلوچستان ءَ انسانی ھکانی ھاتر ءَ کارکنوکیں ادارہ پانک ءِ رِد ءَ پاکستانی پوج ءِ لَٹ ءُ کُٹاں چہ یک مردمے بیران بیتگ-

سربوتگیں ھالانی رِد ءَ داد بخش مسکان گیشکور پوجی بُنجل ءَ پاکستانی پوج ءَ یکشلہ چار روچ ءَ تاں لَٹ ءُ کُٹ کتگ-

پانک رِد ءَ آ پوج ءِ بُنجل ءَ رَوگ ءَ پد بیگواہ بیتگ ءُ مرچی نیم روچ ءَ مردگیں جاوراں دزکپتگ-

دمگی مردمانی رِد ءَ آ لوگ ءَ واتر ءَ آھگ ءَ ٹپانی درد نہ سگ اِتگ ءُ بیران بیتگ-

ھمے وڑ بلوچستان ءِ دمگ پنجگور ءِ ھند چہ گچک ءَ پاکستانی پوج ءَ پت گوں دو چُکاں ھوار زامات ءَ زورانسری آوار جتگ ءُ بیگواہ کتگ اَنت- بیگواہ کنگ بیتگیں مردمانی پجّار جنگیان ءُ آئی ءِ چُک وحید، نصیب ءُ زامات منظور داد کریم نام ءَ چہ بیتگ اَنت-

دمگی اِھوالکار رِد ءَ گوستگیں روچ ءَ پوج ءَ دمگ مردم وتی بُنجل ءَ لوٹائینتگ اَنت آ لَٹ ءُ کُٹانی نشانگ کنگ ءَ پد یل داتگ اَنت وھدے کہ اے مردم داشتگ ءُ یل نداتگ اَنت-

اِھوالکار رِد ءِ اے مردم چہ بُنک ءَ مالدار اَنت ءُ اشی ءَ ساری کوھی دمگ گیڑو ءَ مالداری ءِ کتگ، اود ءَ چہ پوج دگہ بازیں مالدارانی ھمراھی ءَ 2020 ءَ زورانسری لڈ ءُ بار کنگ ءَ لاچار کتگ ءُ گچک کلری ءَ نندگ ءِ پرمان داتگ چریشی ءَ پد آ لاچاری ءَ اد ءَ اَتکگ ءُ پوج بُنجل نزیک ءَ نشتگ اَنت-