بلوچ زالبول رشیدہ زھری ءِ گیر قانودی دزگیری ءُ بلوچستان ءَ زورانسری بیگواھیانی بگیری ءَ شھریانی نیمگ ءَ زھرشانی روانک ءِ کَشگ بیتگ۔
خضدار ءِ زھرشانی ءَ ھواریں شھریاں شھید رزاق چارراہ ءَ داں آزادی چارراہ ءَ زھرشانی روانک ءِ کشگ بیتگ کہ اِشی تہءَ بیگواھیں مردمانی کھول سیاسی پاٹیانی رھشون ءُ نودربراں مزنیں کساس ءِ ھوار بیتگ۔ زھرشانی کنوکاں چہ بلوچستان ءَ بیگواھیں مردمانی یل کنائنگ ءِ لوٹ کُتگ۔
روانک ءَ بھرزیروکانی گُشگ اَت کہ اے اپسوزیگ ھبر اِنت کہ بلوچستان ءَ برجاھیں ریاستی زورانسری بیگواھیانی تہءَ نی زالبول ھم نشانگ کنگ بئیگ ءَ اَنت رشیدہ زھری ءُ آئی کھول داں دہ روچاں تھاریں زنداناں بندیگ کنگ ءُ لٹ شاپی ءَ پد یل کنگ بیتگ اَنت بلے رشیدہ ءِ لوگ واجہ رحیم زھری داں انگت پاکستانی لشکریانی گیر قانودی دزگیری ءَ اِنت۔
زھرشانی کنوکانی گُشگ اَت کہ زورانسری بیگواھیانی پئیمیں گیر انسانی وئیلانی تہءَ خضدار ءِ جھمنند مزنیں کچے ءَ نشانگ کنگ بیتگ اَنت اے وھدءَ ھم اے زھرشانی ءَ ھواریں درستیں مردمانی تہءَ کسی برات، کسی پِت ءُ کسی سیاد ءُ وارث داں انگت تھاریں زنداناں بندیگ اَنت۔
زھرشانی کنوکاں بلوچستان ءَ تہءَ استانی زورانسری بیگواھی ءِ یکشلی ءَ ھلاس کنگ ءُ رحیم زھری ءَ ھوار درستیں بیگواھیں مردمانی زیت یل کنگ ءِ لوٹ کُتگ۔
زانگ بہ بیت رحیم ءُ رشیدہ زھری ءِ زورانسری بیگواھی ءِ بگیرءَ اِشی ءَ پیسر بلوچستان ءِ شھر حب چوکی، تربت ءُ شال ءَ ھوار کراچی ءَ ھم زھرشانی کنگ بیتگ اَنت۔
دومی نیمگ ءَ چاگردی رسانکدرءِ تندجاہ ٹوئیٹر ءِ سرءَ بلوچ، سندھی، پشتون، مھاجر ءُ دگہ باسکاں زھر ءُ گم ءِ درشان کنان ءَ زورانسری بیگواھیانی دارگ ءِ لوٹ کُتگ۔
یات بہ بیت کہ رشیدہ زھری ءُ آئی لوگ واجہ رحیم زھری، وسیگ ءُ چُک 3 فروری ءَ چہ گیشکوری ٹاؤن، ناشناس کالونی شال ءَ پَٹ ءُ پولی بیڑ یے نیام ءَ دزگیری ءَ پد بیگواہ کنگ بیتگ اِت اَنت۔ بیگواھیں محمد رحیم زھری ءِ لوگ بانک، مات ءُ چُک لھتیں روچاں پد یل کنگ بیت اَنت البت رحیم زھری داں اَنگت بیگواہ اِنت۔