بلوچستان ءِ دمگ شال، بولان ، پنجگور ءُ لورالائی بیتگیں جتائیں وئیلانی آسر ءَ دو زالبولاں ھوار ھپت مردم بیران نُھ ٹپی بیتگ اَنت-
گیشیں ھالانی رِد ءَ پنجگور ءِ دمگ سیدان ءَ ناشناسیں سلاہ بندیں پرپٹ سواراں گاڑی ءِ سر ءَ تیرگواری کتگ –
تیرگواری ءِ آسر ءَ یک زالبولے بیران بیتگ، بیران بیتگیں زالبول پروم ءِ جھمنند اِنت- بلے وئیل سوب انگت زانگ بوگ ءَ نہ اِنت-
ھمے وڑ بلوچستان ءِ دمگ بولان ءَ پرپٹ ءَ چہ کپگ ءَ یک زالبولے بیران بیتگ-
بلوچستان ءِ بُنجاھی شھر شال ءِ ھند طور ناصر پھاٹک ءِ نزیک ءَ ٹرک ءُ رکش ءِ میان ءَ ڈک ورگ ءِ آسر ءَ رکشہ ءَ سوار چار مردم بیران ءُ یکے ٹپی بیتگ-
لاش نادُراھجاہ ءَ برتگ اَنت گیشیں چار ءُ ٹپاس بندات کتگ- شال پولیس ءَ ٹرک ڈرائیور دزگیر کتگ ءُ تھانہ ءَ برتگ-
لورالائی ءِ دمگ کلی کچلاک ءِ ھند ءَ چُکانی میڑ ءِ وھد ءَ سنگ لگگ ءَ چہ یک مردمے طور خان بیران بیتگ لاش نادُراھجاہ ءَ برگ بیتگ-
کوھلو ءَ ھال سر بیتگ کہ سبی تبلغی اجتماع ءَ بھر زورگ ءِ ھاتر ءَ رؤکیں گاڑی بھرگڑی ءِ ھند ءَ وئیل ءِ آماچ بیتگ، گاڑی ءَ سوار ھشت مردم سک ٹپی بیتگ اَنت کہ آیانی سیادی چہ کوھلو ءَ اِنت- ٹپی ئیں مردم ڈویژنل ہیڈکوارٹر نادُراھجاہ سبی ءَ برگ بیتگ اَنت-
انچش سبی ءَ تبلیغی اجتماع ءَ رؤکیں چار مردم آوار جنگ بیتگ-
لیویز رِد ءَ اے مردم ٹکی جیڑھے ءِ سر ءَ آوار جنگ بیتگ اَنت، اے مردم ترین راج ءِ جلھی شاک ءُ ٹکی مردماں آوار جتگ اَنت-
لیویز رِد ءَ آوار جنگ بیتگیں مردمانی تہ ءَ حلیم ء کوتان ، شبیر ء ملک اموجان ، عبدالمقتدر ء مولوی عبدالقویم ، پیر محمد سلطان ھوار اَنت ، آوار جنگ بیتگینانی سیادی چہ ھرنائی کلی خدرانی ءَ اِنت، اے مردم یونین کونسل اسپین تنگی ءِ دمگ چہ سور وا آوار جنگ بیتگ اَنت ھرنائی ءَ چہ سبی اجمتاع ھاتر ءَ روگ ءَ بیتگ اَنت-