اسرائیل ءَ کانون ءِ سرینگ ءُ آئی ءِ تہ ءَ دگری ءِ بگیری ءَ زھرشانی

اسرائیل ءَ ھزارانی کساس ءَ مھلوک ءَ سر وزیر نتین یاھو ءِ سرکار ءِ ھلاپ ءَ نزام ءِ دگری ءِ بگیری ءَ دگانی سر ءَ دراتکگ اَنت ءُ زھرشانی اش بندات کتگ-

ھال سرکنوکیں ادارہ ایسوسی ایٹڈ پریس ءِ رد ءَ زھرشانی ءَ ھواریں مردماں راجی بیرک چست کتگ ءُ آیاں “جمھوریت ءُ ںو ٹو ڈکٹیٹر شپ ” ءِ اوگام جتگ-

زانگ بہ بیت اسرائیل ءِ سرکار ءِ نیمگ ءَ آمیدگسی نزام ءِ بدلیانی شوربندیانی جار ءَ پد ڈیھ ءَ سیاسی بھر ءُ بانگی گندگ ءَ ایگ ءَ اِنت ءُ ھر نیمگ ءَ مزن مزنیں زھرشانی گندگ ءَ ایگ ءَ اَنت-

آمیدگسی نزام ءِ بدلی ءِ ھلاپ ءَ اسرائیل ءِ کاروباری مھلوک، گوستگیں پوجی کارمند ھم گپ کنگ ءَ اَنگ ایشانی ھواری ءَ امریکہ ءِ سروک جوبائیڈن ءَ ھم وتی گلگ کتگیں درشان درنگاز کتگ اَنت-

اسرائیل ءِ سروک ءَ ھم اے بدلیانی سر ءَ وتی لیکہ درشان کتگ اَنت بلے سَے شمبے بزانکہ مروچی ئیں روچ ءَ نیتن یاھو ءِ ھمسنتانی نیمگ ءَ یک اژدری کمیٹی ءِ نیاد ءِ پرمان کتگ ءُ ایشی ءِ توک ءَ بدلیانی یک سریزے ءِ منگ ءِ سر ءَ تپاک کتگ ءُ ایشی ءِ سر ءَ گوشگ بیتگ نی تچک ءَ کانونی رنگ ءَ اے جیڑہ پارلیمنٹ ءَ برگ بیت اِنت ءُ چریشی ءَ چہ ڈیھ ءَ یک دگہ سیاسی گر ءُ چِلے ءِ تہ ءَ کپگ ءِ گمان ھست اِنت-

دومی نیمگ ءَ پارلیمنٹ ءِ اپوزیشن لیڈر یائع لپیڈ ءَ پارلیمنٹ ءِ دیم ءَ بیوکیں زھرشانی ءَ تران کنان ءَ گوشتگ کہ آ مئے تواراں ایش کنگ ءَ اَنت، آ راستی ءَ مھکمی ءَ ایش کنگ ءَ اَنت، اے درستاں گوشدارگ ءُ ترسگ ءَ اَنت-

ھمے وڑ سروزیر نتین یاھو ءُ آئی ءِ لوٹوکانی اے چست ءُ ایری ءِ سر ءَ لیکہ اِنت آمیدگس ءِ گور ءَ گیشیں زور ھست اَنت ایشی ءِ کم کنگ ھماھی ءِ دست ءَ اِنت-

ھمے وڑ لس مردمانی گوشگ اِنت اے جوڈیشل ءُ ورھال ءِ سر ءَ سرکار ءِ شوربندی نزام ءِ سر ءَ زورگری ءُ اسرائیل ءِ جمھوریت ءِ پروشگ ءِ بروبری اِنت –

آیانی گوشگ اِنت سروزیر نتین یاھو وت بازین کرپشنانی دیمپان اِنت ھمے واستا آ وتی پھریزگ ءَ اے گامگیج ءَ زورگ ءَ اِنت-

نزام ءِ انساپ ءِ بدلی ءِ اے شوربندی ءِ ھلاپ ءَ سرجمیں ڈیھ ءَ مھلوک پارلیمنٹ ءِ دیم ءَ سر بیتگ اَنت تران کنوکانی گوشگ ات اے زھرشانی ءَ کساس یک لک مردماں بھر زرتگ-

دوشمبے روچ ءَ کش ءُ کراں سر بیوکیں لدھی پھندی ٹرینانی سر ءَ مھلوک یروشلم ءَ سر بیتگ اَنت ءُ شھر ءِ مستریں ریل اسٹیشن ءَ زھرشانی کنوکانی اوگاماں سر ءَ زرتگ-

ایشی ءَ ھوار ھوار سدانی کچ ءَ مھلوک ءَ یھودیانی نیمگ ءَ پاک سرپد بیوکیِ یروشلم ءِ شھر ءِ روکپتی دیوال ءِ گور ءَ دوا اش کتگ ءُ پد ءَ روانک ءَ ھوار بیتگ اَنت-