بلوچستان : جتاجتائیں دمگاں پاکستانی پوج ءِ سر ءَ سلاہ بندیں مردماں اُرش کتگ

بلوچستان ءِ جتاجتائیں دمگ ھرنائی ، پنجگور ءُ بلیدہ ءَ پاکستانی پوج ءِ سر ءَ سلاہ بندیں مردماں اُرش کتگ ءُ دومی نیمگ ءَ اے اُرشانی زمہ واری بلوچ آجوئی لوٹوکیں سلاہ بندیں گل بلوچ لبریشن آرمی ءَ منّ اِتگ اَنت-

بلوچ لبریشن آرمی ءِ جارکش جیئند بلوچ ءَ رسانکدر ءَ شنگ کتگیں درشان ءِ تہ ءَ گْوشتگ کہ مئے سرمچاراں ھرنائی ، پنجگور ءُ بلیدہ ءَ سے جتائیں اُرشاں زورگریں پاکستانی پوج تاوانانی دیمپان کتگ ءُ ھال اھوالے ٹاور تباہ کتگ-

بی ایل اے سرمچاراں گوستگیں شپ ءَ ھرنائی ءَ زورگریں پاکستانی پوج ءِ گچین پوسٹ وتکاریں سلاہ ءُ گرنیڈ لانچراں چہ نشانگ کتگ- سرمچاراں دُژمنیں پوج ءِ پوسٹ سر ءَ بازیں گرنیڈ آس داتگ، اُرش ءَ دو دُژمنیں کارندہ ھما دمان ءَ مرتگ اَنت وھدے کہ بازینے ٹپی بیتگ اَنت-

پروش وارتگیں دُژمن ءَ اُرش ءَ پد جتائیں نیمگاں بازیں مارٹرے آس داتگ بلے بلوچ سرمچار جوانیں جنگی رپک ءُ شوربندی ءَ چہ وتی مُھریں اوتاکاں سر بیتگ اَنت-

ھمے وڑ بی ایل اے سرمچاراں گوستگیں شپ ءَ پنجگور ءِ دمگ گچک، کھن ءَ زورگریں پاکستانی پوج ءِ بُنجاھی بُنجل سر ءَ گرنیڈ لانچر ءِ گولہ آس داتگ ءُ دُژمن ءِ کارندھاں جانی تاوان ءُ مالی تاوان داتگ اَنت-

سیمی اُرش گوستگیں روچ ءَ بیگاہ ءِ ساھت پنچ ءِ نزیک ءَ بلوچ لبریشن آرمی ءِ سرمچاراں بلیدہ ءِ کوھی دمگ کڈکی ءِ ھند ءَ پی ٹی سی ایل شرکت ءِ ھال اھوالی ٹاور تراکناکیں شورو پٹ کتگ ءُ تباہ کتگ ءُ مشینری مانداشتگ ءُ ناکارگ کتگ – اے ٹاور انٹرنیٹ ءُ دگہ ھال اھوالی ءِ ھاتر ءَ دُژمن ءِ کارمرزی ءَ بیتگ-

بلوچ لبریشن آرمی اے اُرشانی زمہ واری ءَ منّ اِیت- ما اے اھد کن ایں کہ زورگریں پوج ءِ سرجمی ءَ دراھگ ءَ تاں مئے جُھد برجم بیت-