من وانین آں!
نبشتہ کار: شازیہ بلوچ
دی بلوچستان پوسٹ
ما ھما وھد ءَ دیمروی کن ایں وھدیکہ ما دْراہ وت ءَ گوں پَھر ءُ ناز ءَ راجی زُبان ءِ جُھدکار ءُ ھزمتکار گْوش ایں۔ بزانکہ دزھُورکی ءِ وھد ءَ مارا وتی بلوچ نودربراں بلوچی وانیگی اِنت۔ ایردستی ءِ آسر ءَ بلوچ راج ءِ نودربراں آئی جِند ءِ راجی ءُ ماتی زُبان ماں وانگجاھاں وانینگ نہ بنت پمیشکا باید اِنت ما اے باوست ءَ یلہ کن ایں مارا بلوچی ماں وانگجاہ ءُ دربرجاھاں وانینگ نہ بوتگ پمیشکا من بلوچی راست نبشتہ کُت نہ کن آں۔ اگاں بلوچی مارا وانینگ نہ بوتگ گُڑا ما وتی زُبان ءِ زِندگ دارگ ءِ ھاتر ءَ جُھد مہ کن ایں؟ گِند ئے ما بلوچ ایں، بلوچی وَ مئے وتی جِند ءِ زُبان اِنت پمیشکا ما دْراہ بلوچی ونت کن ایں، سرپد ھم بہ ایں۔ اگاں کسے بلوچی وانگ ءَ نزُور اِنت گُڑا چہ بلوچی درونتانی وانگ ءَ ھرکس دو روچ ءِ تہ ءَ بلوچی وانگ ءَ زبر بیت۔ اگاں ما دہ سال پہ دری زُبانانی وانگ ءُ دربرگ ءَ زیان کن ایں گُڑا باید اِنت ما یک ماھے ءَ وتی جِند ءِ زُبان ءَ ھم بوان ایں، اگاں چہ درستاں پیسر بلوچی دَرونتاں وانان کن ایں گُڑا ما کم کم ءَ نبشتہ ھم ھیل کن ایں۔
مرچی مئے راج ءِ بازیں بلوچ بْرات ءُ گْوھاراں پہ راجی زُبان ءِ دیمروی ءَ بلوچی وٹس ایپی ءُ پیسبوکی وانگجاہ اڈ کُتگ ءُ راج ءِ نودربراں وانینگ ءَ اَنت کہ زوت بلوچی وانگ ءُ نبیسّگ راج ءِ تہ ءَ البار بہ بیت۔ گُڑا ھورت بچار ئے اے جُھد ءَ ھر زُبان دوست ءُ راجدوستیں مھلوک ءَ باسکی زُورگی اِنت، مارا گوں ھمے زُبان دوستیں جُھدکار ھمراھداری کنگ لوٹ ایت پرچا کہ بلوچی وت وانگ ءُ راج ءِ وانینگ مئے تیوگیں راج ءِ زمہ واری اِنت۔
راستی وَ ایش اِنت کہ ما اے وانگجاہ اِے ھاتر ءَ اڈ داتگ اَنت کہ مرچیگیں انٹرنٹ ءِ زمانگ ءَ ما بلوچ وتی راجی زُبان ءَ وت ماں وت وانان ءَ دربر ایں ءُ ما وتی راجی زُبان ءِ بلاھیں جُھدکار، نبشتہ کار ءُ شائِر جوڑ بِہ بَہ ایں چریشی ءَ مئے زُبان ءِ لبزانک ءَ دیمروی بِہ رس ایت پمیشکا ما گوں شُما دزبندی کن ایں کہ شُما اشتاپ مہ بَہ اِت بلکیں پیسر وانگجاھانی تہ ءَ راہ داتگیں بلوچی دَرونت ءُ نبشتانکاں وانان ءَ دلگوش بہ کن اِت کہ شما اول بلوچی سْیاھگ ءُ نبشتہ رھبند ءَ سرپد بِہ بَہ اِت ءُ پد ءَ کم کم ءَ نبیسّگ ءَ ھیل بہ کن ات۔ وھدیکہ شما نبشتہ کن اِت گُڑا وتی ھر نبشتگیں گالرِداں وت ھم چمشانکے بدے اِت بزانکہ دوبر وت وانان ءَ وتی رَدیاں وت ھم راست کنگ ءِ جُھد بکن اِت پرچا کہ چہ ردیانی راست کنگ ءَ مارا بلوچی ونتگیں دَرونت ھم تازگ بنت۔
گُڑا باید اِنت ما دْراہ بلوچی دْرونتاں وانان ءُ دلگوش کنان ءَ زوت چہ اے وانگجاہ ءَ چیزے دربر ایں ءُ دیم ءَ وت بلوچی وانگجاھاں اڈیان ءَ راج ءِ نودربراں بلوچی بوانین ایں۔ اگاں ما وتی دزھُورکی ءَ بلوچی بوانین ایں گُڑا بزانکہ ما وت دربرگ ءَ ایں، بِل اِت کہ ما رَدی بہ کن ایں۔ اگاں ما رَدی کنگ ءَ ایں گُڑا ایشی ءِ متلب ایش اِنت کہ ما جُھد کنگ ءَ ایں پرچا کہ رَدی وَ کار کنوکیں مردم کن اَنت، تھنا جھدکاریں مردم ءِ دست ءَ ردی بیت، ھما کہ ھچ کار نہ کن اَنت ءُ بے کاری ءَ وتی وھد ءَ زوال کن اَنت گُڑا آیانی دست ردی وَ نہ بیت پمیشکا باید انت ما ھر کس پیسر بلوچی درونتاں وت وان ایں ءُ پد ءَ وتی ھمُک دربُرتگیں دَرونت ءَ راج ءَ ھم بِہ وانین ایں۔ من شمارا وتی یک کُھتکاری یے(تجربھے) بیان کن آں، وھدیکہ من یک وٹس ایپی وانگجاھے پچ کُت ءُ نودربراں وانینگ ءَ ات آں گُڑا بازیں نودربرے ءَ من ءَ گْوشتگ “بانُک تو رَد وانینگ ءَ ئے، اے دَرونت ءَ بچار کہ تو اد ءَ تپورگال(ءِ ءُ ءَ ) اے ھساب ءَ کارمرز بنت، رنگ گال ءُ اے کُمکّارگال ءِ کارمرزی ایش اَنت”-
بزانکہ ما دْراہ چہ وتی رَدیاں راست کنان ءَ دربرگ ءَ ایں پمیشکا باید اِنت ما چہ رَدیاں مہ تُرس ایں۔ اگاں شما مرچی بلوچی زُبان ءِ نودربر اِت گُڑا باندات ءِ اُستاد ھم بَہ اِت، بزانکہ دلپروش وَ انّا بلکیں مارا بلوچی زُبان ءِ سرمچار بوگ لوٹ ایت، بلوچی وانینگ لوٹ ایت۔ اگاں ما دْراہ ھمے داب ءَ جُنزان بَہ ایں گُڑا ما زیت وتی راجی زُبان ءِ نبشتہ ءَ دربر ایں ءُ راجی زُبان ءِ بلاھیں نبشتہ کار ءُ شائِر جوڑ بہ ایں۔ بزانکہ ھچبر بے چمشانک ءَ وتی نبشتگیں نبشتانک ءُ کلوھاں روان مہ دے اِت۔ پیسر وتی نبشتگیں چیزاں دوبر وت بچار اِت ءُ راست کنگ ءِ جُھد بکن اِت وھدیکہ ما ھر کَس ءَ ھمے دل بستگ کہ من بلوچی وانین آں گُڑا ما وتی راجی زُبان ءِ جُھد ءَ سوبین بہ ایں۔ پہ راجی زُبان ءِ دیمروی ءَ مارا وت ماں وت ھمکوپگ ءُ ھمراھدار بوگ لوٹ ایت۔
بلوچ راج ءِ ورناھیں وانِندہ شالا زُبان دوست ءُ راجدوست بہ بات اَنت ءُ بلوچی شالا دیمروی بکنات۔ شالا انچوش بات۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔