بلوچستان ءِ دمگ کیچ ءِ ھنکین مند ءِ کوھی ھند ھمزاھیگ ءَ کاسگانی کئور ءِ سرءَ بستگیں پاکستانی لشکریانی پوسٹ ءِ سرءَ گوستگیں روش ءَ اُرش کنگ بیتگ۔ دومی نیمگ ءَ بلوچستان لبریشن فرنٹ ءَ مند ءَ بیتگیں اُرش ءِ زمہ واری من اِتگ۔
ھندی اھوالانی ردءَ اُرش ءِ وھدءَ تیر ءُ تراکانی توار اِش کنگ بیتگ اَنت، اھوال کار ءَ اُرش ءِ تہءَ پاکستانی لشکر ءِ یک کارمند ئے کُشگ بئیگ ءِ ھال راست کُتگ۔
دومی نیمگ ءَ بلوچستان لبریشن فرنٹ ءِ جارکش میجر گھرام بلوچ ءَ رسانکدراں شنگ کُتگیں درشانے تہءَ گُشتگ کہ 11 فروری ءِ بیگاہ ءِ ادار چار ءَ مند ءِ دمگ ھمزائی ءَ کاسگانی کئور ءِ ھند ءَ بستگیں پوجی چوکی ءِ سرءَ پیسرءَ یک اسنائپر کارندہ ءِ کُشتگ ءُ آئیءَ پد بنجل ءِ سرءَ راکٹ ءُ مزنیں سلاھاں گوں نشانگ کنگ بیتگ چریشی چہ دگہ دو کارمند کُشگ بیتگ اَنت۔
میجر گھرام ءَ دیمترءَ گُشتگ کہ اَے اُرش ءِ تہءَ دژمنیں پوج ءِ سئے کارندہ مُرتگ اَنت ءُ بازیں ٹپی بیتگ اَنت۔ گُڈسرءَ میجر گھرام ءَ گُشتگ کہ زور گپتگیں بلوچستان ءِ آجوئی ءَ داں پاکستانی لشکریانی سرءَ اُرش برجاہ مان اَنت۔