کندھار ءِ پاکستانی کونسل کارگس ءَ بلوچ باھوٹیانی سر ءَ اُرش ءِ شوربندی

پاکستان ءِ چیریں ادارھانی نیمگ ءَ اوگانستان ءَ گوستگیں دو دھکاں باز براں بلوچ باھوٹیانی سر ءَ اُرش کنگ بوتگ چریشی ءَ بازیں باھوٹی ءِ کُشگ بوتگ انت –

گیشیں ھالانی رِد ءَ باوری ایں مردمے ءِ دیم داتگیں تامری ءِ تہ ءَ گندگ بیت کہ اوگانستان ءِ زرباری سوبہ کندھار ءَ پاکستان ءِ کونسل کارگس ءَ لھتے مردم نشتگ انت ءُ بلوچ باھوٹیانی سر ءَ اُرش کنگ ءِ شوربندی ءَ ٹھینگ ءَ انت –

تامر ءِ تہ ءَ اشکُنگ بیت کہ کونسل کارگِس ءِ تہ ءَ پاکستانی چیریں ادارھانی کارمند ھمے گوشگ انت کہ بلوچ باھوٹیانی سر ءَ اُرش کنگ ءِ بدل آھاں مزنیں زرّے دیگ بیت انت –

پاکستانی کونسل خانہ ءَ جوڈ بوتگیں تامرے تہ ءَ چیریں ادارھانی کارمند ءَ ابید کندھار ءِ جھمنند ءِ ھم گندگ بیت کہ آ پاکستان ءِ چیریں ادارھانی ھاتر ءَ کار کنگ ءَ انت –

زانگ بہ بیت بلوچستان ءَ پاکستانی پوج ءِ زلم زوراکیانی سوب ءَ ھزارانی کچ ءَ بلوچ در پہ دری زند گوازینگ ءَ لاچار بوتگ انت ءُ آ روکپتی بلوچستان ءُ اوگانستان ءَ باھوٹی زند گوازینگ ءَ انت، کہ اے بلوچ باھوٹیاں اقوام متحدہ ءِ ادارہ ھم کمک کنگ ءَ نہ انت کہ چریشی ءَ آ روکپتی بلوچستان ءُ اوگانستان ءَ چیریں ادرھانی اُرشانی دیمپان انت –

دی بلوچستان پوسٹ ءَ کندھار ءِ پاکستانی کونسل خانہ اے شوربندی ءِ درگت ءَ اوگانستان ءِ نندوکیں باھوٹی چہ حاجی عبداللہ بلوچ ءَ جست گپتگ کہ اے درگت ءَ آئی ءِ ھیال ءُ لیکھ چی انت گڈا آئی ءَ گوشتگ کہ اے نوکیں گپ ءِ نہ انت پرچا کہ چدوپیسر ھم کندھار ءُ کابل ءِ سفارت ءَ بلوچ باھوٹیانی کشگے شوربندی ٹھینگ بوتگ کہ اشی ءِ بازیں سبوت ءِ مئے گور ءَ ھست انت کہ ھمے زوتاں اوگان ءِ سرکار ءُ انسانی ھکانی ادارھاں دیگ بنت –

زانگ بہ بیت اوگانستان ءَ اے وھدی بازیں بلوچ باھوٹی ءِ پاکستان ءِ چیریں ادارھانی دست ءَ کُشگ بوتگ انت –