بی ایل اے ءَ سال 2022 ءِ سالگشت ’دک ‘ شنگ کتگ

بلوچ لبریشن آرمی ءِ شنگجاہ ’ ھکل‘ ءَ بی ایل اے ءِ سالگشت دوھزار ءُ بیست ءُ دو ءِ دراھیں رپورٹ ’دک ‘ ءِ تاک درپ ءَ شنگ کتگ کتگ شالگشتی رپورٹ ءِ رد ءَ یک ءُ سد ءُ ھشتاد ءُ ھشت اُرشاں سَے سد ءُ شست ءُ چار ءَ گیش پاکستانی پوج مرتگ ءُ یک سد ءُ پنجاہ ءُ پنچ ءَ گیش زدگ بیتگ اَنت-

’ دک ‘ ءِ نام ءَ شنگ بیتگیں سالگشتی ءَ بی ایل اے مجید بریگیڈ ’ آپریشن گنجل ءُ اولی بلوچ فدائی زالبول شاری بلوچ ءِ درگت ءَ گچینی ءِ تاک دیم ھوار اَنت ءُ اسپیشل ٹیکٹیکل آپریشنز اسکواڈ ( ایس ٹی او ایس) ءِ درگت ءَ ھم گچینی تاک دیم ھوار اَنت-

بی ایل اے ءِ رپورٹ ءِ رد ءَ گوستگیں سال ءَ سی ءُ پنچ ھمراہ شھید بیتگ اَنت ءُ گل ءِ نیمگ ءَ سَے فدائی اُرش ھم کنگ بیتگ اَنت-

گل ءِ نیمگ ءَ شنگ بیتگیں رپورٹ ءِ رد ءَ اُرشانی وھد ءُ یک سد ءُ شانزدہ تراک، چل ءُ شش گاڑی ءُ ٹاور تباہ کتگ اَنت ءُ دو پوجی بنجل ھم دستیگ کتگ اَنت-

زانگ بہ بیت فدائی اُرش پنجگور، نوشکی ءُ کراچی ءَ کنگ بیتگ اَنت ءُ پنجگور ءُ نوشکی ءِ فدائی اُرشاں بی ایل اے مجید بریگیڈ ءِ اُرشکاراں ھردوکیں بنجلانی سر ءَ داں سَے روچاں وتی دستیگی برجاہ داشتگ ءُ ھمے وڑ کراچی ءَ چینی آفیشنلزانی سر ءَ مجید برگیڈ ءِ اولی زالبول اُرشکار شاری بلوچ ءَ کتگ-

گل ءِ نیمگ ءَ شنگ بیتگیں اھوال ءَ گیش گوشگ بیتگ کہ چاردہ پاکستانی پوج ءِ کمکار کشتگ ءُ سیزدہ زدگ کتگ اَنت ءُ چار زندگی ءَ دزگیر کتگ اَنت – زانگ بہ بیت دزگیر کتگیناں پاکستانی آرمی ءِ یک کرنلے ھم ھوار اِنت کہ بی ایل اے ءَ بلوچستان ءِ دمگ زیارت ءَ یک ھمراھے ءِ ھواری ءَ دزگیر کتگ ات ءُ پد ءَ کُشتگ ات ءُ دگہ دو کارندہ ھرنائی ءَ ھم دزگیر کنگ بیتگ ات اَنت-

رپورٹ ءِ رد ءَ گوستگیں سال ءَ بی ایل اے ءَ نُھ گچینی اُرش کتگ اَنت چریشانی توک ءَ دو ھیلی کاپٹر، یک ڈرونے جتگ ءُ دور داتگ ءُ یک بیڑے ءَ پوج ءِ سلاہ دستیگ کتگ اَنت-