بلوچستان: پوج ءِ دست ءَ دو مردم آوار جنگ ءَ پد بیگواہ

بلوچستان ءِ جتا جتائیں جاھاں پاکستانی پوج ءَ دو مردم آوار جنگ ءَ پد بیگواہ کرتگ اَنت-

سربوتگیں ھالانی رِد ءَ گوستگیں شپ ءَ کیچ ءِ بنجاھی شھر تربت ءَ چیریں ادارھانی کارمنداں نودربریں ورنا ءِ زورانسری آوار جتگ ءُ بیگواہ کُتگ –

زورانسری آوار جنگ بوتگیں ورنا ءِ پجار نادل بلوچ جھمنند بالگتر ءِ نام ءَ بوتگ – ورنایے زورانسری آوار جنی ءِ ھبر آئی ءِ کھول ءِ مردماں راست کُتگ گوشتگ کہ نادل دوشی چہ تربت ءَ چیریں ادراھانی کارمنداں وتی کمرہ ءِ تہ ءَ آوار جتگ ءُ بیگواہ کتگ –

آئی ءِ نزیکیں مردمانی رِد ءَ نادل بزگر ءُ وانندھیں ورنایے بوتگ، آئی ءَ پارٹ ٹائم ءَ بلیدی ٹریڈنگ کمپنی ءَ کار کُتگ ءُ وتی وانگ ءِ ھرچہ در گپتگ ءُ ونتگ –

آئی ءِ کھول ءِ مردماں چہ سرکار ءَ لوٹ کتگ کہ نادل یل کنائینگ ءَ وتی کرد ءَ پیلو بہ کن انت –

دومی نیمگ ءَ نوشکی ءَ ھال اِنت چہ ھاران ءَ نوشکی ءَ آیوکیں جنگل ءِ ھند ءَ پوج ءَ وین داشتگ ءُ گاڑی ءِ ڈرائیور فیض اللہ آوار جتگ ءُ برتگ –