دزاپ: سَے ماہ ءِ گوزگ ءَ پد ھم ھمک آدینگ ءَ زھرشانی برجاہ

روکپتی بلوچستان ءِ بنجاھی شھر دزاپ ءَ مروچی آدینگ ءِ نماز ءَ پد زھرشانی کنگ بیتگ-

زھرشانی روانک ءَ بازیں کچے ءَ مردماں بھر زرتگ ءُ اود ءَ دزاپ ءِ مکی میست ءَ نماز ءَ پد بندات بیتگ ءُ شھر ءِ دمکاں تران بیتگ ایانی دستاں بینرز، پلے کارڈ کہ آیانی سر ءَ خامنہ ای سرکار ءِ ھلاپ ءُ پوجی آمریت ءِ ھلاپ ءَ نبشتگ بیتگ اَنت-

زھرشانی کنوکاں اوگام جنان ءَ ’دیکتاتور‘ خامنہ ای ‘ سرکار ءِ ترندیں اوگام جتگ ءُ زھدان ءَ پوجی دستاں کشگ بیتگیں مردمانی واستا انساپ لوٹ کتگ-

آیاں گوشتگ کہ ایرانی آمیدگس لس مردماں پاھو دیگ اِنت ءُ آیاں آمیدگساں وتی سپاھی کنگ ءِ موہ ءَ دیگ ءَ نہ اِنت-

آیانی گوشگ ات کہ اے نود روچ ءِ گوزگ ءَ پد ھم اود ءَ کُشگ بیتگیں مردماں انساپ نہ رس اتگ-

آیانی گوشگ اَت اے روچ ھمک آدینگ ءَ ھونی دروشماں پیش کنت کہ چریشی ءَ اود ءَ مردم پہ وتی دردانی کم کنگ ءَ زھرشانی کن اَنت-

زانگ بہ بیت سی ستمبر ءَ آدینگ ءِ روچ ءَ ایرانی سرکار ءِ تیرگواری ءَ چہ زاھدان ءَ بازیں کچے ءَ مردم بیران ءُ زدگ بیتگ ات اَنت –

چرے زھرشانی ءَ پد دومی آدینگ ءَ ھم زھرشانی کنگ بیتگ ات ءُ ھاش ءَ ایرانی لشکر ءِ تیرگواری ءَ بازین کچے ءَ مردم کشگ بیتگ ات اَنت-