چاگردی رسانکدر ءِ تندجاہ ٹوئٹر ءَ شئے حق بلوچ نامی ورناھے ءَ ٹوئٹ کنان ءَ گُشتگ کہ منی کستریں برات کمبر گوں سئے ھمراھاں ھوار دوشی شپ ءَ شال ءَ پھازگی لشکریاں آوار جتگ اَنت۔
آئی ءَ گُشتگ کہ کمبر بلوچ ءُ آئی سنگت شال ءِ عیسٰی نگری ءَ چہ دوشی شپ ءَ بیگواہ کنگ بیتگ اَنت کہ داں انگت آیانی درگت ءَ کھول ءِ گور ءَ ھچ پئیمیں اھوال نیست اِنت۔
شئے حق بلوچ ءَ وتی ٹوئیٹ ءِ تہءَ گُشتگ کہ کمبر بلوچ ءُ آئی سنگت ایف ایس سی ءِ نودربر اَنت ءُ میڈیکل انٹری چکاس ءِ ھاترءَ وانگ ءَ بیتگ اَنت۔ آئی چہ مھلوکءَ دزبندی کُتگ کہ منی برات ءِ آجوئی ءِ ھاترءَ توار چِست بہ کن اَنت۔