روکپتی بلوچستان ءَ بیست ءُ چار ساھاتاں دو کس دگہ یل بیتگ ءُ یک مردمے بیگواہ

سر بیتگیں ھالانی رد ءَ روکپتی بلوچستان ءَ بیست ءُ چار ساھتانی توک ءَ دو مردم یل بیتگ انت ءُ یکے بیگواہ کنگ بیتگ-

گیشیں ھالانی رد ءَ سَے شمبے ءَ روکپتی بلوچستان ءِ بنجاھی شھر دزاپ ءَ آوار جنگ بیتگیں دو مردم یل کنگ بیتگ اَنت-

اشانی توک ءَ ھبدہ سالی ئین ارسلان رئیسی کہ آ یازدہمی تبک ءِ نودربرے سراوان ءِ جھمنند اِنت ءُ ھمے وڑ دومی ءِ پجار محمد زین الدینی کہ آئی ءِ اُمر بیست ءُ سَے سال اِنت زاھدان شھدربرجاھے نودربرے –

ھالانی توک ءَ گوشگ بیتگ کہ اے مردم لٹ ءُ کُٹ کنگ ءَ پد مروچی یل کنگ بیتگ اَنت-

ھمے وڑ ءَ گوستگیں روچ ءَ آوار جنگ بیتگیں اسماعیل شاہ بخش ھم یل کنگ بیتگ ءُ وتی گس ءَ سر بیتگ-

دومی نیمگ ءَ چہ چھبار ءَ یک مردمے آوار جنگ ءَ پد بیگواہ کنگ بیتگ

آوار جنگ بیتگیں مردم ءِ پجار عبدالمالک دوستی ءِ نام ءَ زانگ بیتگ کہ آ چھبار ءِ جھمنند گوشگ بوگ ءَ اِنت-