بلوچستان اکیڈمی تربت ءِ جارکش ءِ نیمگ ءَ شنگ بیتگیں درشان ءَ گوشگ بیتگ تعلیمی چوک ءَ بلوچستان اکیڈمی تربت ءِ بنجاھی کارگس ءِ زمین ءُ چار دیواری وتی زاتی دکان ءُ کورٹرز بندگ ءَ پد زبیر ٹھیکیدار نامیں مردمے ءَ اکیڈمی ءِ گوریچانی روکپت ءِ سیمسر گپتگ اَنت-
آئی ءَ گوشتگ کہ چاگرد ءِ درستیں پھناتان بندوکیں مردماں گوں دزبندی اِنت آ وت بہ رو اَنت اکیڈمی ءُ آئی ءِ زمین ءِ ھداں بہ چار اَنت ءُ پکر مندیں ادارگانی واستا کمے وھد بہ کش اَنت-
ھمے وڑ ءَ بلوچستان اکیڈمی تربت ءِ چیئرمین ڈاکٹر غفور شاد ءِ سروکی ءَ باسکاں اے ڈی سی تابش بلوچ ءَ گند ءُ نند کرتگ-
گند ءُ نند ءَ اے ڈی سی ءِ نیمگ ءَ راجی ادارگ ءِ پھازگ ءِ واستا دزبندی کنگ بیتگ-
اکیڈمی ءِ یک ٹولی ءَ سروک ڈاکٹر غفور شاد ءِ سروکی ءَ اے ڈی سی تابش ءِ کارگس ءَ آئی ءَ را گند ءُ نند کرتگ ءُ در پیش بیتگیں جیڑاہ سرپد کتگ اَنت راجی زمین ءِ سر ءَ زورگر کنوکیں مردم ءِ بارو ءَ سرپدی داتگ اَنت –
اے ڈی سی تابش بلوچ ءَ اکیڈمی ءِ زمین ءِ پھازگ ءَ ھرچ وڑیں گامگیج زورگ ءِ سدکی داتگ اَنت-
اے گند ءُ نند ءَ اکیڈمی ءِ گوستگیں سروک عبید شاد، جنرل سیکرٹری شگر اللہ یوسف، ایگزیکٹو باسک قدیر لقمان، مقبول ناصر، احمد عمر ءُ دگہ دگہ ھوار بیتگ اَنت-