مھسا امینی ءِ ناگتی بیرانی: لندن ءُ پیسر ءَ ایران ءِ بگیردارانی زھرشانی ءُ پولیس ءِ میان ءَ جنگ ءُ چوپ

ایرانی کرد زالبول مھسا امینی ءِ کوش ءِ ھلاپ ءَ لندن ءُ پیرس ءَ ایرانی سپارت ھانہ ءَ سر بیگ ءِ جھد کنوکیں زھرشانی کنوک ءُ پولیس ءِ میان ءَ جنگ ءُ چوپ بیتگ –

ھبررساں ادارہ اے ایف پی ءِ رد ءَ فرانس ءَ پولیس ءَ زھرشانی کنوکانی بگیرء ءَ آنسوگیس کارمرد کرتگ ءُ دگہ گامگیجانی زورگ ءَ سدانی کچ ءَ زھرشانی کنوک ایرانی سپارت ھانہ ءَ داں پُجگ ءَ داشتگ اَنتٹ

مھسا امینی ءِ کوش ءِ ھلاپ ءُ ایران ءَ زھرشانی ءِ وھد ءَ بیران بیتگیں چِل ءُ یک مردمانی گون ءَ پدردی یے درشان ءَ پیرس ءَ دو روچاں چہ شھری مُچ بوگ ءَ اَنت-

زانگ بہ بیت سیزدہ ستمبر ءَ ایرانی پولیس ءَ بیست ءُ دو سالی ئیں کرد ایرانی زالبول مھسا امینی برکہ ءِ سر ءَ نہ کنگ ءِ پژدر ءَ دزگیر کرتگ اَت – پولیس ءِ دزگیری ءَ پد مھسا امینی نادراہ جاہ ءَ برگ بیتگ اَت پد ءُ شانزدہ ستمبر ءَ آئی ءِ مرگ ءِ ھال دیم ءَ اتکگ اَت ءُ چریشی ءَ پد مھسا امینی ءِ کوش ءِ ھلاپ ءَ ایران ءِ بازیں شھراں مھلوک برانز گپتگ اَت کہ تنی وھدی چل ءُ یک مردم ھمے زھرشانی درچ ءَ بیران بیتگ اَنت ءُ بازیں کچے ءَ گرگ بیتگ اَنت –

اے دھمی روچ ءَ ھم ایران ءَ برانز گپتگیں مھلوک ایرموش نہ بیتگ اے زھرشانی ایران ءِ دراھیں اُستاناں سر بیتگ ءُ اود ءَ زھرشانی کنوک وتی برانزی ءِ وھداں سرکاری چیزانی ماندارگ ءُ دگہ تاوانباری کنگ ءَ اَنت اود ءَ شنگ بیتگیں تامر بنداں گندگ بیت اِنت بے ھساب ءَ مھلوک برانز گپتگ اَنت-

دومی نیمگ ءَ ایرانی سرکار ءَ زھرشانی کنوکانی دارگ ءَ تیرگواری ءُ آنسو گیس ءَ ھوار ھوار بازیں جاھاں انٹرنیٹ ھم بند کتگ اَنت ءُ چریشاں چہ درستاں گیش اسرمندیں شھر کہ ایران ءِ بنجاھی شھر تھران گوشگ بیت انت اے وھد ءَ اود ءَ مھلوک ایرانی لیڈر خامنہ ای ءِ سر ءَ زھر ءِ درشان ءَ کنگ ءَ اَنت-

امریکہ ءُ یورپ ءَ ھوار سرجمیں دنیا ءَ زھرشانی کنوک دگانی سر ءَ سر کپتگ ءُ وتی زھر ءِ درشان ءَ کنگ ءَ اَنت-

فرانس ءِ بنجاھی شھر پیرس ءَ ٹروکاڈیرو سکوائر ءَ بیوکیں پُرایمنیں زھرشانی ءِ وھد ءَ ایران ءُ آئی ءِ لیڈر آیت اللہ خامنہ ای ءِ ھلاپ ءَ اوگام جنگ بیتگ-

ھمے وھد ءَ پولیس ءَ زھرشانی کنوکانی درگان درگان کنگ ءَ آنسو گیس کارمرد کرتگ ءُ یک مردمے دزگیر کرتگ-

درملکی ھبررساں ادارہ اے ایف پی ءِ رد ءَ پیرس ءَ پولیس ءِ نیمگ ءَ شنگ بیتگیں درشانی ءخ گوشگ بیتگ کہ وھد وھد ءِ سر ءَ زھرشانی کنوکاں ایرانی سپارت ھانہ ءِ راہ بستگ ءُ چریشی ءِ ھلاس کنگ ءِ جھد کرتگ پولیس ءِ رد ءَ چار ھزار ءِ کچ ءَ مردم زھرشانی ھوار بیتگ اَنت ءُ چریشی ءَ آیانی پشتکنزی ءَ آنسو گیس کارمرد کتگ-

ھمے وڑ برطانیہ ءِ بنجاھی شھر لندن ءَ ھم ھمے رنگ ءَ زھرشانی کنوک ایرانی سپارت ھانہ ءِ نزیک ءَ سر بیتگ اَنت جیڑہ کنگ ءَ دلمانگ بیتگ اَنت ھمے میان ءَ زھرشانی کنوکاں سنگ جنگی کرتگ ءُ بازیں پولیس آفیسرے زدگ بیتگ اَنت-

پولیس ءِ رد ءَ کم چہ کم اے زھرشانی ءَ زدگ بیتگیں پنچ پولیس کارمند نادراہ جاہ ءَ برگ بیتگ اَنت-

چریشی ءَ پیسر پولیس ءَ گشتگ اَت سپارت ھانہ ءِ دیم ءَ بازیں کچے ءَ مھلوک مُچ بیتگ اَنت ءُ چریشی ءَ آ بد امنی تالان کنگ لوٹ اَنت-