نبشتانک: بے بانزلیں مرگ
نبشتہ کار: پرویز دیدگ
دی بلوچستان پوسٹ
دیگر ءِ وھد اَت کہ من وتی لوگ ءِ راستیں کش ءَ روچ برکت ءِ نیمگ ءَ یک درچکے ءِ چیر ءَ نندوک اِت آں، من ءَ اسلم شاہ ءِ کتاب (Dumb Girlگنگیں جنک)گون اَت من اولی باب (Chapter) ھلاس کُتگ اَت ءُ دومی باب وانگ بندات کُتگ اَت کہ اناگت ءَ یک کسانیں بالی مرگے ءِ پِیسکگ ءِ توار منی گوشاں کپت، اے یک انچیں دردناکیں توارے اَت کہ اے توار من ءَ سک ءَ بے چاڑ کنگ ءَ اَت، من ءَ یک سیاھْیں چادرے گون اَت، من چادر بُن ءَ ایرکُت ءُ کتاب چادر ءِ سر ءَ دور دات۔ من ھمے درچک ءِ سر ءَ لِکّپت اوں، چار اِت تاں درچک ءِ یک بزیں ٹانبے ءِ سر ءَ مرگے ءَ کُدویے بستگ اَت۔ من کُدو ءِ نزیک ءَ شت اوں چار اِت، کُدو ءَ گوں یک کسانُکیں چُورویے اَڑ اِتگ اَت، من جلد جلدی ھمے کسانیں چورو ءَ را دست ءَ کُت کہ بن ءَ مہ کپ اِیت من چورو کُدو ءِ تَہ ءَ ایرکت ءُ چورو ءِ پیسکگ بند بوت۔ من جھل ءَ ایر کپت اوں ءُ جیڑگ ءَ لگت اوں من جْیڑ اِت ھمے ساھت ءَ کہ چورو چہ کُدو ءَ کپگ ءَ اَت اے ساھت ءَ چورو باز بے وس ءُ لاچار اَت۔
ھمے جیڑگ ءِ تَہ ءَ من ءَ ھما گونڈل ءِ ھیال اتک کہ آ ھم چو ھمے چورُو ءِ وڑ ءَ بزّگ، بےوس ءُ لاچار اَت۔ اِے دوھزار ھبدہ (2017) ءِ گپّے کہ من گوں وتی سنگتاں تربت ءَ پہ وانگ ءَ شت اوں سے رَمس اَت آدینگ ءِ روچ ءِ ساھَت یک ءُ نیم ءِ وھد اَت، من چہ وتی کوٹی ءَ دراَتک آں دیم پہ مسیت ءَ جُماہ ءِ نماز ءِ وانگ ءِ واست ءَ روان بوت آں، نماز ءِ وانگ ءَ چہ پد مسیت ءِ مزنیں گیٹ ءَ چہ در آیگ ءِ ساھت ءَ منی چم یک گونڈلے ءَ کپت اَنت، آ گیٹ ءِ دپ ءَ اوشتوک اَت ءُ آئی ءِ نرم ءُ نازرکیں دست پہ پنڈگ ءَ ٹال اِت اَنت بلے بے ستک ءُ بےباوریں گپ اِش اِنت کہ سرجمیں مردم چہ مسیت ءَ درشُت اَنت بلے کس ءَ یک کلدارے ھم اے گونڈل ءَ را نہ دات اے مردمانی سنگ دلی ءَ را دیست من ھیران اِت آں، من ھمے سرپد بوت آں کہ اے دنیا متلب ءِ اِنت، اِد ءَ کَسّ کسّے ءِ بزّگی ءَ نہ چار ایت ھرکس تھنا وتی لاپ ءِ پِگر ءَ کنت ءُ ایوک ءَ وتی لاپ ءَ چنت ءُ مان کنت۔
مھلوک دومی ءِ بزّگی ءُ بے وسی ءَ نہ چار اِیت، اگاں کسّے ءَ دومی ءِ بزّگی ءُ بے وسی بہ چار اِتیں گُڑا مروچی نہ دُزّی بوتگ اَت، نہ یکّے دومی دُژمن جْوڑ بوتگ اَت، اِے دُگنیا ءُ تہ ءَ مارا یکّے دومی ءِ دست گِرگی اِنت، وتی بزّگ ءُ بے وسیں مھلوک ءَ را کمک کنگی اِنت، کجام مردم کہ اڑ ءُ جنجالانی تہ ءَ کپتگ گُڑا باید ھمیش اِنت کہ ما آئی ءِ بزّگی ءُ لاچاری ءَ بہ مار اَنت ءُ اِے گْرانیں ساھتاں آئی ءَ را دست بِہ گِر اَنت تاںکہ دیمتر ءَ آ پہ وت ءَ راھے ءَ درگپت کرت بِہ کنت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔