کلات ءَ بوتگیں اُرشانی زمّہ واری بی ایل اے ءَ منّ اِتگ انت

بلوچ سلاہ بندیں گل بلوچ لبریشن آرمی ءِ جارکش جیئند بلوچ ءَ رسانکدراں وتی شنگ کرتگیں درشان ءِ تہءَ کلات ءِ دمگ منگچر ءَ پاکستانی پوج ءِ سر ءَ اُرش ءُ گزگ اناری ءَ یوفون ٹاور ءِ ماندارگے زمّہ واری منّ اِتگ اَنت-

جارکش جیئند بلوچ ءَ وتی درشان ءِ تہءَ گوشتگ کہ مئے سرمچاراں گوستگیں شپ ءَ کلات ءِ دمگ منگچر ءَ زورگیریں پاکستانی پوج ءِ بنجاھی بنجل ءِ مزنیں گیٹ ءِ دپ ءَ گاٹ دیؤکیں دژمنیں کارمند گرنیڈ لانچر ءَ گوں نشانگ کرتگ انت- مئے سرمچاراں بازیں گرنیڈ لانچر دژمن کارمندانی سر ءَ آس داتگ ءُ چریشی ءَ دژمن ءِ سَے کارمنداں گیش زدگ بوتگ اَنت-

جارکش ءَ دیمتر ءَ گوشتگ کہ مئے سرمچاراں شش ستمبر سال دوھزار بیست ءُ دو ءَ کلات ءِ دمگ گزگ اناری ءَ یوفون ءِ ٹاور تراکناکیں شورواں گوں تباہ کتگ ءُ دگہ مشینری ھم مانداشتگ انت چریشی ءَ اے ٹاور سرجمی ءَ ناکارہ بوتگ-

جارکش ءَ گوشتگ کہ اے ٹاور ءِ سر ءَ دژمن ءِ چیریں ادارھانی کارمند سرمچارانی چاریگری ءِ کوشست ءَ بوتگ اَنت- دژمن ریاست وتی پوجی لوٹانی ھاتر ءَ اے ٹاور ءَ کارمرز کنگ ءَ بوتگ-

جارکش ءَ گڈسر ءَ وتی درشان ءِ تہ ءَ گوشتگ کہ بی ایل اے ھردوھیں ارشانی زمہ واری ءَ من اِیت ءُ مئے اُرش بلوچستان ءِ آجوئی ءَ تاں برجاہ مان اَنت-