بلوچ اسٹوڈنٹس ایکشن کمیٹی تربت ھنکین ءِ نیاد برجم دارگ بوتگ

بساک تربت ھنکین ءِ ھنکینی نیاد برجم دارگ بوتگ- ‎مصدق بلوچ ھنکینی کارمستر ءُ ھمّل بلوچ ھنکینی کارگشاد گچین کنگ بوتگ اَنت-

بلوچ اسٹوڈنٹس ایکشن کمیٹی تربت ھنکین ءِ ھنکینی نیاد ھنکینی کارمستر سعید بلوچ ءِ پاگ واجھی ءَ برجم دارگ بوتگ۔ دیوان ءِ گچینی مھمان بنجاھی کمیٹی ءِ باسک محمد بلوچ بوتگ۔ دیوان ءَ ھنکینی کارگشاد اھوال، ایرادی باوست، گلی کار، جھانی ءُ ھندی سیاسی جاورھالانی سر ءَ تْران ءَ پد آؤکیں گامگیج ءَ نوکیں ھنکینی کابینہ گچین کنگ بوتگ ، مصدق بلوچ ھنکینی کارمستر ءُ ھمّل بلوچ ھنکینی کار گشاد گچین کنگ بوت انت –

دیوان ءَ بنجاھی کمیٹی باسک مھمد بلوچ ءَ تْران کنان ء گشت کہ بساک یک نودربر گلے ءِ بستار ءَ گوں یک مھکمیں لیکہ یے ءَ بندوک

لیکہ ھرچ یک گلے ءِ پگری ءُ املی د٘روشُم ءَ مکسد ءَ سر بوگ ءِ کشکاں گیشین ایت۔ مروچی بلوچ اسٹوڈنٹس ایکشن کمیٹی مھکمیں لیکہ یے ءِ پجی ءَ گوں تچکیں ڈسپلنے ءَ ادارتی بنیات ءَ وتی کاراں جنزینگ ءَ اِنت، ھمے سوب انت کہ مرچی گل بلوچستان ءِ کُنڈ کُنڈ ءَ سر بوتگ ءُ بلوچ نودربرانی توار جوڑ بوتگ۔ بلوچ اسٹوڈنٹس ایکشن کمیٹی بلوچ نیشنلزم ءِ بنیات ءَ کار ءَ انت۔ گل ھمے جھد ءَ انت کہ بلوچ نودربراں راجی سیتانی بارو ءَ پوہ بکنت ءُ نودربر وتی ھکانی گرگ ءِ پجی ءَ وتی زبان ءُ دودانی پھازگ ءِ جھد ءَ بہ کن انت۔ دیمتر ءَ سنگتاں گشت کہ ما یک نودربر گلے ءَ بندوک ایں ءُ نودربرانی جیڑھانی گیش گیوار کنگ گل ءِ ھژدری یے کارے مروچی بلوچ نودربر بلوچستان ءَ ابید پاکستان ءِ کجام ھم وانگی ادارھانی تہ ءَ بیگواہ کنگ بوگ ءَ انت، وانگی ادارھانی تہ ءَ آھانی پروپائیلنگ کنگ بوگ ءَ اِنت۔ نودربر زھنی ٹارچر کنگ بوگ ءَ انت ءُ آ یک ترسے ءِ آماچ کنگ بوگ ءَ انت۔ دومی نیمگ ءَ ادارھانی تہ ءَ نودربراں ھمینکس جیڑہ دیم ءَ پیداک انت کہ آ ھر وھد ءَ ھمے جیڑھاں مان گیش اتگ انت کہ وتی تکنیکی ءُ المی روِشت ءَ برجاہ داشت کُت کنگ ءَ نہ اَنت۔ نودربرانی گار ءُ بیگواہ کنگ، پروپائیلنگ ءُ ایدگہ کسان ءُ مزنیں جیڑھاں چے ھمے زانگ بیت کہ چہ بلوچ نودربراں آوانی وانگی ھک پچ گرگ بوگ ءَ انت۔ بلوچ اسٹوڈنٹس ایکشن کمیٹی ءِ جھد ھمیش انت کہ بلوچ نودربراں یک پترے ءِ سر ءَ یکجاہ کنگ، آوانی تھا سیاسی سنچ ءُ زانت پیداک کنگ ءَ نودربرانی ھمکوپگی ءَ جیڑھانی گیش گیواری ءُ نودربرانی ھکانی ھاتر ءَ جھد کنگ انت۔ ‎آؤکیں گامگیج ءِ بنگپ ءَ ھنکین ءِ گوستگیں کابینہ ھلاس کنگ بوت ءُ نوکیں ھنکینی کابینہ گچین کنگ بوت۔ نوکیں ھنکینی کابینہ ءَ چہ مصدق بلوچ ھنکینی کارمستر، منیرہ بلوچ ھنکینی کُمک کار مستر، ھمّل بلوچ ھنکینی کار گشاد، یاسر بلوچ ھنکینی کمک کار گشاد ءُ ساجد بلوچ ھنکینی ھالرسانی کار گشاد گچین کنگ بوت انت۔ گڈسر ءَ سوگندی بھر ءَ پد دیوان ءِ ھلاسی ءِ جار پرینگ بوت۔