بلوچستان ءِ شھر شال ءَ ریڈ زون ءَ بیگواھیں مردمانی کھول ءِ نندانک ءَ مروچی 48 روچ اِنت کہ برجاہ ءَ اِنت-
ھمے سال ءِ جولائی ءَ زیارت لشکر کشی ءُ دروگیں میڑ ءِ بگیری ءَ گورنر گس دیم ءَ ریڈ زون ءَ بیگواھیں مردمانی کھول نندانک برجاہ ءَ اِنت- مروچی نندانک ءَ 48 روچ سرجم بوتگ کہ اود ءَ گیشتریں کھول نادُراھی ءِ آماچ اَنت , زھرشانی ئیں بُنجل ءَ ایانی الاج مروچی ھم برجاہ ءَ اِنت-
کھول گوشگ اِنت کہ موسم ءِ تُرندی یکشلہ زھرشانی ءَ نزور ءُ نادُراہ بوگ ءَ اَنت، بلے لوٹانی منّگ ءَ انگت چست ءُ ایر نہ بوتگ-
کھول گوشگ اِنت کہ آیاں اُمیت اِنت کہ گوستگیں روچاں زورانسری آوار جنی ءِ جوڑ کتگیں وفاقی کمیٹی زور نندانک جاہ کیت ءَ آیاں گوں گند ءُ نند کن اَنت ءُ آیانی ھکّیں لوٹانی سر ءَ گامگیج زور اَنت-
کھول ءَ گْوشتگ کہ 21 جولائی ءَ چہ برجاھیں نندانک وھد ءَ ھم تاں انّو بلوچستان ءَ ھمکروچ زورانسری آوار جنی ءِ دْرچ اوشتوک نہ اِنت بلکیں ھمے میان ءَ ریاستی پوج ءِ نیمگ ءَ وتگڑیں لشکر کشی ءِ نام سر ءَ دروگیں میڑاں مردمانی کُشگ ءِ پنچ رپورٹ نکش کنگ بوتگ، آیاں گوں گمان کنگ بیت کہ زورانسری آوار جنی ءُ دروگیں میڑ ءِ گر ءُ دار ءَ اے ریاست تنی وھدے سنجیدگ نہ اِنت-