شال: سی ٹی ڈی ءِ دست ءَ بیگواھیں مردمے کشگ بیتگ، کھول ءِ نندانکی زھرشانی

شال ءَ سرینا چار راہ ءِ سر ءَ نندانک ءِ سبب ءَ اے وھد ءَ مزنیں کچے ءَ ٹریفک جام بیتگ، زھرشانی ءَ نندوکیں مردماں بھتام جتگ کہ کاؤنٹر ٹیرر ازم ڈیپارٹمنٹ ( سی ٹی ڈی) ءَ یک دزگیر کرتگیِ مردمے کشتگ ءُ پد ءَ آئی ءِ لاش کھول ءِ ھوالگ ءَ کتگ –

دمگی مردمانی گوشگ اِنت عنایت اللہ غبیرزئی نامیں مردمے گوستگیں شپ ءَ سی ٹی ڈی ءَ آئی ءِ دو ھمراھانی ھمراھی ءَ پشتون آباد ءَ دزگیر کرتگ ءُ گون وت برتگ مروچی بیگاہ ءَ آئی ءِ لاش کھول ءِ مردمانی دست ءَ دیگ بیتگ-

اے وھد ءَ دمگی مردماں لاش زرتگ ءُ سرینا چوک ءَ نندانکی زھرشانی بندات کرتگ کہ چریشی ءِ سبب ءَ دگ بند ءُ روگ ءُ آیگی مھتل اَنت-

زھرشانی ءَ نندانک ءَ مردمانی گوشگ اِنت دانکہ مجرماں سزا نہ رس ایت مئے زھرشانی برجاہ بیت اِنت-

دومی نیمگ ءَ عنایت اللہ ءِ ھمراھی ءَ دزگیر کنگ بیتگیں دو مردم انگت بیگواہ اَنت-