کراچی: مُلا ایاز بلوچ ءِ زورانسری آوار جنی ءِ بگیری ءَ زھرشانی

مروچی آدینگ ءِ روچ ءَ سندھ ءِ مزن شھر کراچی ءَ پریس کلب ءِ دیم ءَ بنجاھی جمعیت اہلحدیت ءُ اہلحدیث یوتھ فورس ءِ چیردستی ءَ بلوچستان ءَ سیادی داروکیں دینی زانتکار ایاز تگرانی ءِ زورانسری آوار جنی ءِ بگیری ءَ زھرشانی کنگ بوتگ –

ھمے وھد ءَ سوبائی نائب ناظم سید عامر نجیب ءُ سیاسی امور ءِ سرکماش محمد اشرف قریشی ءَ تران کنان ءَ مُلا ایاز بلوچ ءِ زورانسری آوار جنی ایر جتگ ءُ دیم ءَ آرگ ءِ لوٹ کتگ –

آھاں گوشتگ دینی زانتکارے ءَ آوار جنگ ءُ بیگواہ کنگ ایرجنگی انت –

ترانکارانی گوشگ ات کہ ملک ءِ تہ ءَ زورانسری آوار جنیانی درچ گیش بوان انت ءُ بلوچستان ءَ ھر تکاں سیادی داروکیں مردم آوار جنگ بوگ ءَ انت –

آھاں ملا ایاز بلوچ ءَ ھوار درسیں بیگواھیں مردمانی دیم ءَ آرگ ءِ لوٹ کُتگ –

زانگ بہ بیت مُلا ایاز بلوچ دوازدہ اگست ءِ شپ ءِ ادار دو ءَ کراچی ءِ دمگ لیاری ءَ ھوٹل ءِ تہ ءَ پولیس ءُ چیریں ادارھانی کارمنداں آوار جتگ بوتگ –

ایاز تگرانی بلوچ تربت ءِ جید علما کرام ءُ جامعہ سلفیہ تربت ءِ کلانیں استادانی تہ ءَ ھوار انت آئی ءَ گوستگیں بازیں دھکاں جامعہ اسلامیہ ءِ تہ ءَ اُستاد ءِ دروشم ءَ وتی کار ءَ کنگ ءَ بوتگ ءُ پانزدہ سال بوتگ کہ یک مسیت ءِ پیش امام بوتگ –

جمعیت اہلحدیث ءِ رھشونانی گوشگ ات کہ بازیں دھکاں بلوچستان ءَ مردمانی زورانسری آوار جنی درچ برجاہ انت، بے سوب ءَ مردمانی آوار جنی ءُ بیگواھی ءَ مردمانی تہ ءَ چدوگیش زھر پاد کئیت ھمے ھاتر ءَ نوں زورانسری آوار جنی ءِ درچ بند بوگ لوٹیت –