بلوچی زبان ءِ گشندہ مسلم ھمل ءُ منھاج مکتار ءَ چاردہ اگست ءَ بھر زیروکیں گشندھانی کرد ایر جتگ

چاردہ اگست ءَ تربت ءَ بیتگیں مراگش ءَ بھر زیروکیں بلوچ گشندھانی کرد بلوچی زبان ءِ گشندہ مسلم ھمل ءُ منھاج مکتار ءَ ایر جتگ اَنت۔

وتی راج ءِ جونانی سر ءَ شادمانی کنگ ءَ وتی ازم ءِ بے شرپی لیک آں ۔ مسلم ھمل

اے گپانی درشانی بلوچی زبان ءِ گشندہ مسلم ھمل ءَ وتی پیس بک ءَ یک پوسٹے ءِ چہ درشان کتگ اَنت –

مسلم ھمل ءَ گشتگ بلوچستان وتی اھد ءِ گرانیں جاوراں دُچار اِنت بلوچستان ءَ چشیں لوگے یا ھنکینے نیست کہ اود ءَ مردم وتیگانی جونانی سر ءَ موتک نہ کنگ ءَ اَنت۔ ھر یک لوگے ءَ یکے ناں یکے چہ سالاں بیگواہ اِنت۔ آیانی مات ءُ گْوھاراں شال، کراچی ءُ اسلاماباد ءَ دگّانی سر ءَ اکس گون اَنت ءُ زھرشانی کنگ ءَ اَنت۔

آئی ءَ گشتگ کہ اے جاورانی گندگ ءَ رند یک بلوچے ءِ بستار ءَ اگاں من بلوچ مات ءُ گْوھارانی چمّانی ارساں کِمار مہ کناں ءُ آجوئی ءِ شادھی بہ کناں گُڑا اے آیانی ٹپّانی سر ءَ واد ءِ پرّیچگ ءِ وڑیں کارے بیت ءُ زرد ءُ ازم ءِ سوداگری یے بیت۔

آئی ءَ گُشتگ کہ چہ گْوستگیں شپ ءَ آرپ بلوچ ءُ شاھجان داؤدی ایر جنگ بیگ ءَ اَنت کہ آ چوں اے جاوراں شادھی کُت کن اَنت۔ مرچی بلوچستان ءِ سر ءَ زوراوری ءِ جاور درستانی دیم ءَ چو روچ ءَ پدّر اَنت۔ آیانی گوش نہ دارگ ءِ گپ ءُ تران ھم بیگ ءَ اِنت۔

مسلم ھمل ءَ گشتگ بلے گوش نہ داروک ءُ گْوشوک چہ اے گپ ءَ گمان کناں بے ھیال اَنت کہ یک نیمگے کراچی یونیورسٹی ءِ نودربر ھیات بلوچ ءِ جون آئی ءِ مات ءِ کُٹّ ءَ ایر اَت دومی نیمگ ءَ ھمے مردم گوں کُشندھاں شادھی کنگ ءَ اِت اَنت۔

آئی ءَ گشتگ مئے نام ءُ مئے ازت مئے سرزمین ءَ گوں بندوک اِنت۔ اگاں ڈیھ ءُ زبان مہ بنت گُڑا مارا بستار نیست۔ من ءَ ھم چشیں دیواناں لوٹائینگ بیتگ بلے وتی ازم ءُ زبان ءَ بھا کُت نہ کناں۔ پمیشکا چشیں دیواناں بھر نہ زیراں۔ اگاں چریشی ءَ منی زند بہ روت من ءَ بژن نہ بیت۔

ھمے وڑ ءَ بلوچی زبان ءِ آشوبی گشندہ منھاج مکتار ءَ وتی ٹوئٹر تندجاہ ءَ گوستگیں روچ ءَ بھر زیروکیں گشندہ ایر جتگ اَنت-

منھاج مکتار ءَ گشتگ بلوچ گشندہ پاکستان ءِ وتگڑیں شاتکامی ءَ سوت گوش اَنت ءُ بلوچانی کشندھاں گوں ھوار اَنت ءُ سوت گوش اَنت آ بلوچ نہ اَنت-

آئی ءَ گوشتگ کہ بلوچ مات ءُ گوھارانی پریات ءُ ژانگولیں لاشانی کپگ ءُ بلوچ راج ءِ گلامی ءِ پرواہ اش نیست اِنت اے وڑیں گشندھاں بلوچ راج بائیکاٹ بہ کنت-

زانگ بہ بیت چاگردی رسانکدراں ھم چاردہ اگست ءَ بھر زیروکیں بلوچ گشندہ ایرادانی دیمپان اَنت-