پاکستان بلوچستان ءِ تہ ءَ بے کساس ءَ تاکت کارمرز کنگ ءَ اِنت – ماما قدیر بلوچ

بلوچستان ءِ بنجاھی شھر شال ءَ پریس کلب ءِ دیم ءَ بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی چار ھزار ءُ ھپسد ءُ بیست ءُ نُھ روچ سرجم بوتگ انت –

مروچی نیشنل پاٹی ءِ زالبول ٹولی ءَ سوبائی جنرل سیکرٹری کلثوم نیاز، شیرین بی بی ءُ دگہ مردماں بنجل ءَ اتکگ ءُ دلپدردی درشان اتگ –

ھمے وھد ءَ گل ءِ کمک سرکماش ماما قدیر بلوچ ءَ اتکگیں مردمانی میان ءَ گوشتگ کہ پاکستان بلوچ ءُ پشتونانی چکچینی ءَ وتی سرجمیں زور ءَ جنگ ءَ انت کہ اشی ءِ درچ ھنگت برجاہ انت ءُ اشی ءِ ھاتر ءَ پاکستان میاں استمانی ادارہ ءُ ڈیھاں کمک گرگ ءَ انت – مزنیں کچے ءَ بلوچ ءُ پشتونانی سر ءَ اُرش، ھزارانی کچ ءَ بلوچ درپہ در، ھزارانی کچ ءَ زنداناں بندیگ کنگ بوگ ءَ انت – بلوچ چاگرد ءِ تہ ءَ ھر تک ءُ پھناتاں سیادی داروکیں اوار جنگ ءُ آھانی زانگولیں جون چگل دیگ بوگ ءَ انت – پاکستان ءَ اے زوراکیاں کنگ ءَ انت ءُ بلوچ سرڈگار ءَ وتی ایر دست کنگ ءِ جھد ءَ انت ءُ ھنگت تاں بلوچستان ءِ کنڈ کنڈ ءَ زورگیریں پوج بلوچانی سر ءَ اُرش کنگ ءُ بلوچ پرزنداں آوار جنگ ءُ بیگواہ کنگ انت ءُ اھانی زانگولیں جونان چگل دیگ ءَ انت –

ماما قدیر بلوچ ءَ گوشتگ وی بی ایم پی ءِ نیمگ ءَ دنیا ءِ ھر کُنڈ ءَ پاکستان ءِ زوراکیانی بگیری ءَ توار چست کنگ بوتگ بلے ھستیں وھد ءَ ھما انسانی ھکانی ادارہ کہ وت ءَ گُش انت آھاں بلوچستان ءِ جاورھال گندگ ءَ نیا انت – میاں استمانی انسانی ھکانی ادارہ رسانکدر ھر فورم ءَ توار چست کنگ ءَ پد ھم انسانی ھکانی ٹاہ دیوک ءُ اقوام متحدہ ھچ گوشگ نہ انت- بلوچستان ءِ اے پدردیں جاور ھالاں میاں استمانی انسانی ادارھانی ٹاہ بے نپ بوتگ کہ اشی ءِ رد ءِ امل ءَ انسانی ھکانی میاں استمانی روچ ءَ سرجمیں بلوچستان ءَ پاکستان ءِ زوراکی ءُ میاں استمانی ادارھانی ھچ نگوشگ ءِ بگیری ءَ زھرشانی کنگ بیت اِنت –