گوریچانی وزیرستان ءَ بیتگیں وتکش تراک ءِ زمہ واری “امام “نامیں گلے ءَ منّ اتگ

خیبر پختونخواہ ءِ دمگ گوریچانی وزیرستان ءَ پاکستانی پوج ءِ کاروان ءِ سر ءَ بیتگیں بمب تراک ءِ زمہ واری “امام ” نامیں گلے ءَ منّ اتگ-

اتحاد سلاہ بندیں اسلامی مجاھدین “امام “ءِ جارکش ابوبصیر وزیرستانی ءَ وتی شنک کرتگیں درشان ءِ تہ ءَ گُشتگ “امام ءِ استشھادی مجاھد ” ءَ پاکستانی گلام پوج ءِ سر ءَ سوبمندیں اُرشے کتگ ءُ ھپت کارندہ کشتگ ءُ زدگ کتگ اَنت ” –

پاکستانی پوج ءِ جارکش ءِ رد ءَ پوجی کاروان ءِ سر ءَ اُرش گوریچانی وزیرستان ءِ دمگ میر علی ءَ کنگ بیتگ -وتکش تراک ءَ چار پوجی کارندہ مرتگ اَنت-

آئی ایس پی آر ءِ نیمگ ءَ شنگ بیتگیں درشان ءِ رد ءَ انٹیلی جنس ایجنسیاں وتکش تراک کنوک ءُ آئی ءِ کمکارانی درگت ءَ پٹ ءُ پول بندات کتگ-

دیم ءَ اتکگیں نوکیں گل “امام ” ءِ نیمگ ءَ اے اولی وتکش اُرش اِنت گوستگیں ماہ ءَ خیبرپختونخواہ ءَ پولیس کارندھانی سر ءَ بیتگیں اُرش ءِ زمہ واری ھم ھمے گل ءَ زرتگ اَت کہ چریشی ءَ اے ایس آئی گل آفریدی ءِ سر ءَ اُرش ءَ ھوار بیتگ اَت چریشی ءَ آ مرتگ ات-

اوگان واکدار ءُ تالبان گلانی سر ءَ مزنیں نگاہ ایر کنوکیں پشاور ءِ کلانیں اھوالکار، اینکر پرسن ءُ کواس رفعت اورکزئی ءَ گوشتگ اے گل ءِ آیگ ءَ ھچ شک نیست اِنت اشی ءِ گور ءَ وتکش تراک کنوک دگر ھم ھست اگاں اے گل ٹی ٹی پی ءِ رنگ ءَ چو مزیں گلے نہ اِنت بلے سیکورٹی پورس ءُ پولیس ءِ سر ءَ اُرشانی واک ءَ داشت کنت-