شال: بنجاھی شھدگ ءِ سر ءَ بیگواھیں مردمانی کھولانی زھرشانی نندانک

بلوچستان ءِ بنجاھی شھر شال ءَ بیگواھیں مردمانی کھولانی نیمگ ءَ زھرشانی مروچی ھم برجاہ بوتگ – درنگاز کنوکان زھرشانیانی تہ ءَ ترندی آرگے بندات کتگ – ھمے درگت ءَ مروچی بلوچستان شھدربر جاہ ءِ دیم ءَ بنجاھی شھدگ بند کنگ بوتگ ءُ بازیں ادارے ءَ زھرشانی کنگ بوتگ –

نندانک ءَ بیگواھیں مردمانی کھول، نودربر ءُ سیاسی گلانی باسک ھوار بوتگ انت وھدیکہ شھدک ھر وڈیں رؤگ ءُ آیگے ھاتر ءَ بند کنگ بوتگ –

زھرشانی ءِ میان ءَ بیگواھیں مردمانی کھولانی جاور نگیگ بوتگ انت – درنگاز کنوکاں گوشتگ کہ دھ روچ انت کہ بیگواھیں مردمانی کھول بازیں ھئور ءُ سارتی ءَ ابید دگانی سر ءَ نشتگ انت – سرکار ءُ انتزامیہ سنجیدہ نہ انت –

نندانک ءِ آرگنائزر وائس فار بلوچ مسنگ پرسنز ءِ رھشون سمی دین بلوچ ءَ گوشتگ کہ مئے زھرشانی برجاہ انت ما بیگواھیں مردمانی یل کنائینگ ءُ دگہ لوٹانی منارینگے ھاتر ءَ مروچی بلوچستان شھدربرجاہ ءِ دیم ءَ نندانک جتگ – مارا بازیں دھک ءِ بیت کہ بلوچستان ءِ سرکار، مزن وزیرءُ ججاں دچار کپتگ انت بلے مئے جیڑہ گیشگیوار کنگ نہ بیت – کسے ھست کہ مارا گوش بہ داریت؟ بلوچ راج ءِ سر ءَ بؤکیں زلم ءُ زوراکیانی بگیری ءَ انسانی ھکانی کانود گامگیج زرت کناں؟ انسانی ھکانی گل یا ریاست بلوچ سر ءَ بوتگیں زوراکیانی بگیری ءَ گامگیج زرت کنت؟

سمی دین بلوچ ءَ گوشتگ کہ شال ءِ جھمننداں گوں دزبندی انت کہ بیا ات ما ءُ شما انسانیت ءِ رکینگے ھاتر ءَ مڑ ایں، اے مئے ناں شمے رکینگے جھد انت، اے شمے آؤکیں پدریچ ھاتر انت پہ ھما روچ ءِ ھاتر انت کہ ھر یکے بید تُرس وتی سرڈگار ءِ سر ءَ زند گوازینت بہ کنت –

زانگ بہ بیت بیگواھیں مردمانی کھول سوبائی سرکار ءِ نیمگ ءَ جوڈ کنگ بوتگیں کمیشن ءِ سر ءَ اوست دارگ ءَ نہ انت –

سوبائی سرکار ءَ زیارت وئیل ءِ بگیری ءَ بلوچستان ہائی کورٹ ءِ جسٹس اعجاز محمد سواتی ءِ چیردستی ءَ پٹ پولی کمیٹی ءِ اڈ دئیگ ءِ جار جتگ بوتگ بلے کھولاں لوٹ کتگ کہ آرمی ءِ چیف گون آھاں دچار بہ کپیت –

کھولاں مروچی دہ روچ انت کہ وتی لوٹانی ھک ءَ زھرشانی انت کھولانی گوشگ انت کہ بیگواھیں مردمانی جیڑہ سوبائی سرکار ءُ ھکومتی نمائندگاں وس ءَ در انت آرمی چیف باور بہ کنائینیت ءُ مئے دوستیگیں مردمانی یل کنائینگ ءَ وتی کرد ءَ پیلو بہ کن انت –

درانگاز کنوکانی گوشگ ات کہ بیگواھیں مردمانی جیڑہ گیشگیواری پوجی واکدارانی دست انت ھمے ھاتر جنرل باجوا بیگواھیں مردمانی کھول گوم ءَ گند ءُ نند بہ کنت ءُ باور بہ کنائین ایت کہ بیگواھیں مردم یل بنت گڈا گند ءُ نند بیت کنت –

درنگاز کنوکاں شھدگ ءِ سر ءِ نندانک ءَ پد بلوچستان شھدربرجاہ ءَ بگر تاں گورنر کارگس ءَ روانک ءِ کش اِتگ وھدیکہ ریڈ زون ءِ نندانک برجاہ انت –