بلوچستان ءَ ھورانی گوارگ: لسبیلہ ءَ سدانی کچ ءَ مردم کمک ءِ وداریگ

بلوچستان ءِ دمگ لسبیلہ ءِ ھند اوراکی ءَ زالبول ءُ زھگاں ھوار کم چہ کم سَے سد مردم کمک ءِ وداریگ اَنت، اود ءَ ترندیں ھورانی گوارگ ءَ پد توپان ءَ دمگ آپ ءَ کتگ لوگ کپتگ اَنت ءُ مھلوک سرپچیں آسمان ءں چیر ءَ نشتگ اَنت –

گوستگیں بیست ءُ چار ادارانی گوازگ ءَ پد انتزامیہ آپ ءَ گٹ کتگیں مھلوک ءِ در کنگ ءَ سوبمند نہ بیتگ ءُ بے لوگیں مردمانی گور ءَ ورگ ءُ وردنی سامانانی نیستی ءِ دیمپانی اِنت-

کمکی وداریگ ءِ جیڑہ ءِ سر ءَ سر وزیر بلوچستان عبدالقدوس بزنجو ءَ گامگیج زرتگ آئی ءَ واکداراں پرمان داتگ کہ آپ ءَ گپتگیں کھول کشگ بہ بنت-

دومی نیمگ ءَ نیشنل ڈیزاسٹر مینجمنٹ اتھارٹی ءَ یک درشانے ءَ گوشتگ کہ دو ھیلی کاپٹر اوراکی ءَ آپ ءَ گپتگیں مردمانی کشگ ءَ لسبیلہ ءَ سر بنت –

اشی ءَ ابید واکداراں ٹاہ داتگ کہ سیکورٹی فورسز ءَ بیلہ ءُ اوتھل ءَ کم چہ کم سد مردم رکینتگ ءُ کش اتگ ءُ مھکمیں جاھاں سر کتگ اَنت وردنی ساز ءُ سامان داتگ اَنت-

ترندیں ھورانہ گوارگ ءِ سبب ءَ شال ءُ کراچی ءِ میان ءَ سَے پُھلاں ھوار مزن شھدگ بازیں جاھاں پرشتگ راہ بند بیتگ کہ چل ءُ ھشت ادارانی گوازگ ءَ پد ھم راہ پچ نہ بوتگ –

ھب ءِ کور ءَ مزنیں ھار ءِ آرگ ءَ پھل مزنیں کچے ءَ پرشتگ ءُ کپتگ، لسبیلہ ءِ انتزامیہ ءِ واکداراں گشتگ شال ءُ کراچی ءِ راہ کم چہ کم پنچ جاہ ءَ پرشتگ ءُ ھنگول ءِ دمگ ءَ مزن شھدگ پنچ کلو میٹر ءَ ھم آپ ءَ وتی ارجان جتگ-

بلوچستان ءِ سرکار ءِ ھالرسان میر زیا لانگو ءَ گوشتگ کہ بیتگیں ھوراں بلوچستان ءَ زالبول ءُ زھگاں ھوار یک سد ءُ چار مردم بیران بیتگ اَنت-

دومی نیمگ ءَ لسبیلہ ءِ چیمبر آف کامرس اینڈ انڈسٹری ءَ ھب ءِ کور ءَ برتگیں پھل ءِ جوڑ کنگ ءِ دزبندی کتگ-

لسبیلہ چیمبر آف کامرس اینڈ انڈسٹری ءَ پاور کمپنی کڈن کتگ اَنت کہ آ ھب ءِ پھل ءَ جوڑ بہ کن اَنت-

مھکمہ موسمیات ءَ گمان داتگ کہ زند ءِ داروکیں شھریاں ھورانی ھلاسی ءَ انگت یک روچے ءِ ودار کنگ کپ ایت مھکمہ موسمیات ءَ گوشتگ لپ ھورانی درچ بیست ءُ ھپت جولائی ءَ چارشمبے ءُ پشمبے ءَ کمی بندات بنت-