بلوچستان ءِ شھری ءُ ھزارہ راج ءِ رھشون ’طاھر خان ھزارہ‘ مروچی سھب ءَ دل ءَ گپتگ ءُ بیران بیتگ۔ آئی ءِ بیرانی ءِ درگت ءَ بلوچ نیشنل موومنٹ ءِ رھشوناں پدردی درشان اِتگ۔
بلوچ نیشنل موومنٹ ءِ چاگردی رسانکدر ءِ بنجاھی تندجاہ ٹوئٹر ءَُ شنگ کُتگیں درشان ءِ تہ ءَ گُشتگ کہ تاھر ھان ھزارہ بلوچستان ءِ پر ارزشتے مردمے اَت ، آئی ءَ مدام بلوچستان ءِ مردمانی پلہ مرزی ءَ وتی توار چست کرتگ۔ ٹوئٹر درشان ءِ تہ ءَ بی این ایم ءَ گُشتگ کہ اَے بژنی گپے کہ آ پہ وھد درمان نہ بیگ ءِ سبب ءَ بیران بیتگ ءُ ما چہ آئی ءِ بیرانی ءَ کھتیگ ایں۔
بی این ایم ءَ وتی درشان ءِ گُڈ سر ءَ گُشتگ کہ مروچی، ما چہ توانمندیں توارے ءَ زبھر بیتگ ایں۔ بلوچ راج ءُ بلوچستان آئی (تاھر ھان ھزارہ) ءَ مردم دوستے ءِ بستار ءَ یات کن اَنت۔
بی این ایم ءِ چیئرمین ڈاکٹرنسیم بلوچ ءَ وتی پدردی کلہو ءِ تہءَ گُشتگ کہ ما طاھر ھان ھزارہ ءِ بیرانی ءِ سرءَ پدردیگ اِنت آ بلوچستان ءِ مھلوک ءِ یک ترندیں توار ءِ بیتگ۔
آئی ءَ گُشتگ اے دردانی ساھتاں ما آئی راج، کھول ءُ کَس وارثانی ھمراہ اِنت۔
بی این ایم ءِ جنرل سیکریٹری دلمراد بلوچ ءَ آئی درگت ءَ وتی ٹوئٹ ءِ تہءَ گُشتگ کہ طاھر ھزارہ بزگیں راجانی یک ترندیں توارے بیتگ۔ آئی ءَ وتی مھلوک ءُ بلوچستان ءِ بزگیں راجانی نسل کشی ءِ بگیری ءَ توار چِست کُتگ۔