دامن شاشان پبلک لائبریری کمیٹی ءِ لس مجلس ءِ دیوان گْوستگیں کماش انجینئرمسعود بلوچ ءِ سروکی ءَ برجم دارگ بوتگ، اِے دیوان ءِ تہ ءَ کماش ءِ بنداتی تراں، گُْوستگیں کاروانی رپورٹ، دود ءُ رھبند سازی ،شرگِداری نشست، جُست ءُ پسّو ،آیوکیں گامگیج ءُ گچینکاری ءِ سرھالانی سر ءَ باوست کنگ بوتگ۔
دیوان ءِ تہ ءَ کماش انجینئرمسعود بلوچ ءَ تران کنان ءَ گْوشت کہ من ھما سنگتانی منت ءَ گر آں کہ آیانی واھشت ءُ ھیال ءَ لیکھاں کتابجاہ ءِ واستا لیکھے دیم ءَ آرت ھم گرنچ بوت اَنت 2018 ءَ ما کتابجاہ ءِ بنداتی کُت گُڑا آ وھد ءَ ما سَے باسک اَت ایں کہ ھزاراں اڑ ءُ جنجالانی دیمپانی کنگ کپت بلے ما وتی جھُد برجاہ داشت ، 2020 ءَ ما کتابجاہ ءِ کارانی دیم ءَ برگ ءِ واستا یک کمیٹے اڈ دات کمیٹی ءِ سنگتاں گوں شریں دابے ءَ وتی کاران ءَ دیم ءَ بُرتگ۔ مروچی کتابجاہ ءِ کوٹی تیار بوگ ءَ اِنت۔ من سرپد باں اِے گُوستگیں کمیٹی ءِ سنگتانی بودناکی اِنت، من اُمیت کناں آھوکیں کمیٹی ءِ زمہ وار وتی زمہ واریاں زان اَنت ءُ پہ کتاب جاہ ءِ دیما برگ ءَ جوانیں گامگیج زور اَنت۔ دیمروئی ءِ واستا ھرچ وڑیں کربانی ءَ پہ چک ءُ پد نہ بنت ۔
دیوان ءِ تہ ءَ ساڑی ئیں باسکاں تران کناں ءَ گْوشت انچوش کہ گوستگیں کمیٹی ءِ سنگتاں شریں دابے ءَ وتی زمہ واری پیلو کُتگ اَنت ءُ کتابجاہ ءِ واستا کوٹی گرائنتگ۔ دِگہ کتاب جاہ ءُ چاگرد ءِ واستا شریں دروشمے ءَ کار کُتگ مارا اُمیت اِنت آیوکیں کمیٹی ءِ سنگت پہ چاگر ءُ کتابجاہ ءَ شریں رنگے ءَ کار کن اَنت۔
دیوان ءِ گُڈسر ءَ آیوکیں گامگیج ءِ سرھال ءِ سر ءَ داتگیں سوجانی سر ءَ چار ءُ بہ چار کنگ بوت ءُ جْوانیں توجیل زورگ بوت اَنت۔ گچین کاری ءِ واست ءَ چہ دیوان ءِ سنگتانی سلاہ ءَ مشورہ ءَ گچین کاری پَتّرے اڈ دیگ بوتگ، گچین کاری ءِ پَتّر ءِ کماش سنگت سکی ساوڑ، باسک ڈاکٹر وھید اھمد ءُ گنج بکش لال بلوچ بوتگ اَنت۔ کْوھنیں کمیٹی ءِ کابینہ ھلاس کنگ ءُ نوکیں کمیٹی ءِ کابینہ ءِ اگدہ دار گچین کنگ بوت اَنت۔
کماش انجینئرمسعود بلوچ ، کُمک کماش جاوید اکبال بلوج ،کارگُشاد نسیر کیا بلوچ ، کُمک کارگُشاد ازیز شاد بلوچ ، شنگکار گل ھسن بلوچ آفس سکریٹری شھباز اسلم بلوچ جنکیں باسکانی زمہ وار سئیدہ دلجان بلوچ گچین کنگ بوت اَنت۔
نوک گچین بوتگیں سنگتاں اھد کرت کہ پہ کتابجاہ ءُ چاگرد ءِ دیمروئی ءِ واستا ھروڑیں کربانی ءَ چک ءُ پد نہ بنت ءُ کتابجاہ ءِ تہ ءَ ھر سال میان استمانی کتابی روچ ءَ برجم دار ایں ، کتابی چمشانک، ھیلکاری دیوان اڈ دے ایں ۔
دیوان ءِ گُڈسر ءَ چہ سنگتانی موکل ءَ نوک گچین بوتگیں کارگُشاد ءَ دیوان ءِ ھلاسی ءِ جار پرینت۔ دیوان ءِ ھلاسی ءِ چہ پد کتاب جاہ ءِ نیمگ ءَ ساجد ارمان ءَ گیشتر کتاب وانگ ءِ وجہ ءَ کتابے سوگات کنگ بوتگ ۔