شال: پاکستانی کرنل ءِ ھمراھی ءَ بیگواہ بیتگیں دومی کس ءِ لاش دزکپتگ

چہ زیارت ءَ بلوچ لبریشن آرمی ءِ دست ءَ آوار جنگ بیتگیں کرنل لئیق ءِ سیاد عمر جاوید ءِ لاش ءِ دزکپگ مروچی زیارت ءَ پاکستانی پوج ءَ ٹاہ داتگ-

کرنل لئیق ءُ آئی ءِ ناکو زتک عمر عمر جاوید چہ شال ءَ دیم پہ زیارت ءَ روگ ءِ وھد ءَ ورچوم ءِ ھند ءَ سلاہ بنداں دزگیر کتگ ءُ وتی ھمراھی ءَ برتگ ات اَنت دومی روچ ءَ کرنل لئیق ءِ لاش زیارت منگی ڈیم ءِ نزیک ءَ دزکپتگ ات ءُ آئی ءِ ھمراھی ءَ آوار جنگ بیتگیں عمر جاوید بیگواہ ات –

زیارت ءِ وئیل ءَ پد گوستگیں چار روچاں پوج ءَ آوار جنوکانی شوھاز ءَ زیارت ءَ ھوار کش ءُ گوری دمگاں ترندیں لشکر کشی بندات کتگ ات ءُ پوج ءَ ٹاہ داتگ ات کہ کرنل لئیق ءِ آوار جنوک جتگ اَنت-

پاکستانی پوج ءِ جارکش ءَ بلوچ لبریشن آرمی ءَ بندوک لفٹیننٹ کرنل لئیق مرزا بیگ ءُ آئی ءِ سیاد ءِ آوار جنوک شاھرگ ءِ نیمگ ءَ روگ ءَ بیتگ اَنت کہ پوج ءَ انگیر کتگ اَنت آوار جنوکاں کرنل ءِ کُشگ ءِ جھد کتگ ءُ تتکگ اَنت-

جارکش ءَ زیارت ءِ کش ءُ گوراں بیڑ ءِ وھد ءَ نُھ مردمانی کوش ءِ ٹاہ داتگ ات ءُ بیڑ ءِ وھد ءَ یک کارندھے ءِ بیرانی ءِ ھال شنگ کتگ ات-

بلے بلوچ سیاسی پھناتانی گوشگ اِنت کہ بیڑ ءِ وھد ءَ گمان کنگ بیگ ءَ اِنت اے پیسر ءَ آوار جنگ بیتگیں مردم اَنت کہ کُشگ بیتگ اَنت ءُ اشانی اکساں پدر بیت اے پیسری مردم اَنت-

زانگ بہ بیت دوازدہ ءُ سیزدہ جولائی ءِ میانی شپ ءَ لیفٹیننٹ کرنل لئیق بیگ مرزا (ڈی ایچ اے شال ءَ بندوک بیتگ) ءُ آئی ءِ ناکوزھگ عمر سلاہ بندین مردماں راہ بستگ ءُ پجار ءَ پد وتی گون ءَ برتگ ات اَنت کہ چریشی ءَ.پد بیڑی برجاہ اِنت –

کرنل لئیق ءِ کوش ءِ زمہ واری بی ایل اے ءَ من اتگ ات ءُ گوشتگ ات کہ بلوچ آمیدگس ءَ مرگ ءِ سزا داتگ ءُ چریشی ءَ پد کشتگ ءُ تنی وھدی دومی ءِ بارو ءَ بی ایل اے ءِ گپ دیم ءَ نیتکگ اَنت-