زیارت ءِ لشکر کشی ءَ پوج ءَ دگہ پنچ مردم ءِ جنگ ٹاہ جتگ

زیارت ءِ لشکر کشی ءَ پوج ءَ دگہ پنچ مردم ءِ جنگ ٹاہ جتگ

گوستگیں روچاں زیارت ءَ چہ بی ایل اے ءِ دست ءَ دزگیری ءَ پد کُشگ بوتگیں کرنل لئیق ءُ آئی ءِ سیاد عمر ءِ یل کنائینگ ءُ چست کنوکانی بگیری ءَ لشکر کشی تنی وھدے برجاہ ءَ اِنت-

پاکستانی پوج ءِ ھمگرنچ آئی ایس پی آر ءَ لشکر کشی ءِ میان ءَ دگہ پنچ مردم جنگ ءِ ٹاہ جتگ وھدے کہ یک کارندھے ءِ بیران بوگ ءِ گپ پدر کتگ-

آئی ایس پی آر ءِ گْوشگ اِنت کہ کرنل لئیق ءِ سیاد عمر ءِ یل کنائینگ ءِ ھاتر ءَ لشکر کشی برجاہ ءَ اِنت وھدے کہ آئی ایس پی آر ٹاہ جتگ کہ خوست دمگ ءَ پنچ مردم پوج گوم ءَ میڑ ءَ جنگ بوتگ وھدے کہ اُرش ءَ پوج ءِ ھولدار خان محمد ھم جنگ بوتگ-

زانگ بہ بیت گوستگیں روچ ءَ ھم پوج ءَ دو مردم ءِ جنگ ءِ ٹاہ جتگ بلے دنیگت ءَ آزاتیں رسانکدرانی نیمگ ءَ چہ بلوچ لبریشن آرمی ءِ باسکانی جنگ ءِ گپ پدر نہ بوتگ-

زانگ بہ بیت 12 ءُ 13 جولائی ءِ شپ ءَ لیفٹیننٹ کرنل لئیق مرزا ( کہ ڈی ایچ اے شال ءَ ساڑی بوتگ) ءُ آئی ءِ سیاد عمر سلاہ بنداں راہ بستگ ءُ پجّار کنگ ءَ پد وتی ھمراھی ءَ برتگ اَنت گوں- چریشی ءَ پد دمگ ءَ لشکر کشی برجاہ ءَ اِنت-

کرنل لئیق ءِ لاش گوستگیں روچ ءَ منگی ڈیم نزیک ءَ دست کپتگ وھدے کہ بلوچ لبریشن آرمی ءَ اشی ءِ زمہ واری منّ اِتگ ءُ گْوشتگ کہ کرنل لئیک بیگ مرگ ءِ سزا داتگ-

دومی نیمگ ءَ کرنل لئیق ءِ کزن عمر ءِ درگت ءَ بی ایل اے درشان دیم ءَ نیتکگ اَنت وھدے کہ آئی ایس پی آر رِد ءَ کرنل لئیق سیاد عمر تنی وھدے بی ایل اے دست ءَ اِنت-