تربت ءَ تیرگواری ءَ چہ یک مردمے بیران ءُ، مستونگ ءَ یک لاشے دست کپتگ-

بلوچستان ءِ ضلع کیچ ءِ بُنجاھی شھر تربت ءَ سلاہ بندیں مردمانی تیرگواری ءَ چہ یک مردمے بیران ءُ وھدے کہ مستونگ ءَ بازیں روچانی کوھنیں لاشے دست کپتگ-

تیرگواری ءَ چہ بیران بوتگیں مردم ءِ پجّار معاذ نام ءَ چہ بوتگ-

اِھوالکارانی رِد ءَ تیرگواری ءِ وئیل تربت ءِ دمگ سنگانی سر ءَ بوتگ وھدے کہ کُشگ بوتگیں مردم ءِ درگت ءَ گْوشگ بوگ ءَ اِنت آ پولیس ءَ کار ءَ بوتگ-

کُشگ بوتگین ءِ درگت ءَ ھمے گْوشگ بوگ ءَ اِنت فٹ بالرے بوتگ ءُ دمگی فٹبال ٹیم ءِ لیبی یے بوتگ- وئیل سوب زانگ نہ بوتگ-

دومی نیمگ ءَ چہ مستونگ ءَ ھال سر بوتگ کہ ولی خان لیویز تھانہ ءِ سیمسر ءَ پشکرم جنگل ءَ ممنی ءِ ھند ءَ یک ناشناسیں مردمے ءِ کوھنیں لاشے دست کپتگ کہ پجّار ھاتر ءَ شال نادُراہ جاہ ءَ برتگ اِت-

لاش نزیک ءَ یک وتاسے ءُ ھالیگ پشنگ ھم دست کپتگ اَنت ،لاش کوھن بوگ ءِ سبب ءَ پجّار ءِ کابل نک بوتگ ءُ لاش نزیک ءَ چمپل ھم دست کپتگ-