بولان ءَ پاکستانی پوج ءِ پانگس ءِ سر ءَ اُرش

سربوتگیں ھالانی رِد ءَ ناشناسیں سلاہ بندیں مردماں بولان ءَ پاکستانی پوج ءِ پانگسے ءِ سر ءَ اُرش کُتگ –

ھالانی رِد ءَ ناشناسیں مردماں نودگھار ٹاکری ءَ برجاھیں پوجی پانگس ءِ سر ءَ اُرش کُتگ، اُرش ءَ ھردو نیمگاں تیر گواری کنگ بوتگ وھدیکہ اُرش ءَ پد سلاہ بندیں مردم تچگ ءُ روگ ءَ سوبین بوتگ انت –

سرکاری واکدارانی نیمگ ءَ تنی وھدی اے اُرش ءِ درگت ءَ ھچ وڈیں درشان دیگ نہ بوتگ بلے اے اُرش ءَ پیسر ھم اے دمگاں پاکستانی پوج ءِ سر ءَ اُرش کنگ بوتگ ءُ پوج ءَ جانی ءُ مالی تاوان رستگ –

گوستگیں روچ ءَ ھم پیر اسمائیل ءَ پاکستانی پوج ءِ سر ءَ تراکناکیں شورواں گوں اُرش کنگ بوتگ ات کہ اُرش ءِ آسر ءَ پاکستانی پوج ءَ جانی ءُ مالی تاوان بوتگ ات وھدیکہ اُرش ءِ زمّہ واری بی ایل اے ءَ منّ اِتگ ات –
مروچی بوتگیں اُرش ءِ زمّہ واری تنی وھدی ھچ گل ءَ نہ منّ اِتگ –