زورانسری آوار جنگ بوتگیں نودربر حفیظ بلوچ یل کنگ بوتگ

بیگواھیں بلوچ نودربر حفیظ بلوچ درکانودی توپک ءِ زور ءِ بیگواہ کنگ بوتگ، آوار جنی ءَ پد آئی ءِ بگیری ءَ دروگیں ارزی نبشتہ کنگ بوتگ ءُ مروچی بزاں سِی جنوری ءَ انسداد دہشتگردی ءِ آمیدگس ءَ پہ شرپ یل داتگ ءُ آئی ءِ کیس ھلاس کتگ –

ھمے سال ءِ ھشت فروری ءَ پاکستانی پوج ءِ دست ءَ زورانسری آوار جنگ ءُ پدا سی ٹی ڈی ءِ دست ءَ دیگ بوتگیں نودربر حفیظ بلوچ مروچی یل کنگ بوتگ –

حفیظ بلوچ پاکستانی پوج ءَ بلوچستان ءِ دمگ ھزدار ءَ ھما وھد ءَ آوار جتگ ءُ بیگواہ کتگ کہ آ یک پرائیوٹ اکیڈمی ءَ زھگاں وانینگ ءَ بوتگ – حفیط بلوچ ءِ زورانسری آوار جنی ءِ بگیری ءَ بلوچستان ءَ ھوار دگہ دمگاں زھرشانی کنگ بوتگ پدا رند ءَ سی ٹی ڈی ءَ آئی ءِ سر ءَ ناشرکاری ءِ بھتام جتگ ءُ ھمے گوشتگ کہ آ ڈیرہ مراد جمالی ءَ دزگیر کنگ بوتگ مروچی آ پہ شرپ یل دیگ بوتگ –

بلوچ اسٹوڈنٹس کونسل ءَ حفیظ بلوچ ءِ یل بوھگے درگت ءَ وشی درشان اِتگ ءُ لوٹ کتگ ایندگہ بیگواھیں نودربر ھم یل کنگ بہ بنت –
جارکش ءَ گوشتگ کہ اسلام آباد ءِ ہائی کورٹ ءِ چیف جسٹس عطرمن اللہ ءَ پنجاپ ءُ اسلام آباد ءِ زانشجاھاں بلوچ نودربرانی نسلی ہراسمنٹ ءُ پروفائلنگ ترندی ءَ گوں ایرجتگ ءُ اے یک گیر انسانی جرمے گوشتگ – بلے اشی ءَ ابید زانشجاھاں بلوچ نودربرانی ترسینگ ءُ پروفائلنگ تیزی ءَ گوں برجاہ انت کہ بلوچ نودربرانی پروفائلنگ کنگ بیت ءُ زورانسری آوار جنگ بنت کہ پہ بلوچ نودربراں گرانیں سپریے –

جارکش ءَ گوشتگ کہ درسیں بیگواھیں مردمانی یل بوھگ وشیں گپ یے ما برزی تبک ءِ واکداراں چہ لوٹ کن ایں کہ فیروز بلوچ ءَ ھوار زنداناں بندیگیں بلوچ پرزند یل کنگ بہ بنت –

زانگ بہ بیت بلوچستان ءِ دگہ دمگاں ھم ھمے ھال آھگ انت کہ زورانسری آوار جنگ بوتگیں مردم سی ٹی ڈی ءِ دست ءَ دیگ بوگ ءَ انت – نیشنل پاٹی ءِ بنجاھی سیکریٹری جنرل جان محمد بلیدی ءَ مروچی وتی ٹویٹر نبشتگ کہ چہ کیچ ءَ زورانسری آوار جنگ بوتگیں مردمانی سی ٹی ڈی بارکھان، موشکی ءُ نصیر آباد ءِ تانھاں زاھر بوھگ سمج ءَ ڈن انت – آئی ءَ گوشتگ کہ دروگیں ارزی واپس زورگ بہ بنت ءُ بیگواھیں مردم یل کنگ بہ بنت –