سربوتگیں ھالانی رِد ءَ پاکستانی پوج ءَ مستونگ ءَ گِسے ءِ سر ءَ بیڑ برتگ ءُ یک مردمے زورانسری آوار جتگ ءُ بیگواہ کتگ –
گیشیں ھالانی رِد ءَ پاکستانی پوج ءَ بلوچستان ءِ دمگ مستونگ گردگاپ ءَ بیست ءُ ھشت جون ءِ شپ ءَ عبدالمطلب سرپرہ ءِ گِس ءَ بیڑ برتگ پرشت پروش کتگ ءُ گِس ءَ ساڑی ئیں مردم توپک ءِ زور ءَ بیھار داتگ انت –
اھوالکار ءِ رِد ءَ پوج ءَ بیڑ ءِ میان ءَ ورنایے زورانسری آوار جتگ ءُ گوں وت برتگ بلے تنی وھدی ورنا ءِ پجار نہ بوتگ –
زانگ بہ بیت گوستگیں سال ءِ بیست ءُ چار دسمبر ءِ شپ ءَ ھم پاکستانی پوج ءَ عبدالمطلب سرپرہ ءِ گِس ءَ بیڑ برتگ ءُ آئی ءِ دو برات زورانسری آوار جتگ ءُ گوں وت برتگ انت –
اھوالکار ءَ دیمتر ءَ گوشتگ کہ اشی ءَ پیش آوار جنگ بوتگیں مردم یل کنگ بوتگ انت بلے گوستگیں روچ ءَ آوار جنگ بوتگیں ورنا انگت بیگواہ انت دیم ءَ آرگ نہ بوتگ –