پاکستان ءَ سرجمیں بلوچستان تراکناکیں شوروانی امبارے جوڑ کرتگ – ماما قدیر بلوچ

بلوچستان ءِ بنجاھی شھر شال ءَ بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی برجاہ، زھرشانی بنجل ءَ مروچی چار ھزار ءُ شش سد ءُ ھشتاد ءُ ھپت روچ سرجم بوتگ انت –
مروچی زھرشانی بنجل ءَ چہ کلات ءَ سیاسی ءُ چاگردی باسک عبدالمجید بلوچ، محمد بلوچ ءُ دگہ مردماں بنجل ءَ اتکگ ءُ بیگواھیں مردمانی کھولانی گون ءَ دلپدردی درشان اتگ –

وی بی ایم پی ءِ کمک سرکماش ماما قدیر بلوچ ءَ اتکگیں مردمانی میان ءَ تران کنان ءَ گوشتگ کہ بلوچ پرزندانی زانگولیں جون، بمب گواری ءِ آماچ بوتگیں ھند دمگ ءُ گام گام ءَ پاکستانی پوج ءِ پانگس ءُ میاں استمانی سامراج ءِ لالچی ءَ بلوچ سرڈگار ھونیں کتگ – اشی ءَ زانگ ءَ پد بلوچ راج ءَ وتی رکینگ ءُ وتی پرزندانی یل کنائینگے ھاتر ءَ پرایمنیں جھد ءَ سرخرو بوھگ ءَ ساڑی بوتگ انت – کہ بازیں وھد ءَ پد بلوچ راج ءِ ھوار بوھگ ءُ آھانی جزبگ ءُ بیگواھیں مردمانی کھولانی مھکمی ءُ پُرایمنیں جھد ءَ تاکت ءِ شاھیم مٹیں اِتگ کہ پاکستان زورگیری ءُبلوچ سرڈگار لٹ پُل کنوکیں سامراجی شوربندی اڈاندانی آماچ کتگ انت چریشی ءَ پد پاکستان ءَ بلوچ چکچینی ءِ ھاتر ءَ وتی سرجمیں تاکت پٹ ءَ آرتگ –

آئی ءَ گوشتگ کہ گوستگیں سینزدہ سالانی ءَ تہ ءَ پاکستان ءَ بلوچ راج ءِ تہ ءَ پرایمنیں جھد کنوکیں گل مھکمیں انداز ءَ سرچ اینڈ ڈسٹرائے ءُ بجن چگل دے پالیسی ءِ رِد ءَ نشانگ کتگ ءُ بلوچستان ءِ ھر کوچگ ءُ دمگ ھونین کتگ انت ءُ سیاسی رھشون ءُ ورنائیں سیاسی باسک مھکمیں انداز ءَ ٹارگٹ کتگ انت ءُ اے کارانی تہ ءَ پاکستان ءِ پوج ءُ چیریں ادارہ ڈیت اسکواڑ ءُ پاکستان ءِ رسانکدر شریں وڑی ءَ کار بوتگ انت –

ماما قدیر بلوچ ءَ گوشتگ کہ پاکستانی پوج ءَ وتی زلم زوراکیانی تہ ءَ سک باز گیشی آؤرتگ پاکستان ءَ سرجمیں بلوچستان شوروانی امبار ءِ جوڈ کتگ – ھمے زوتاں پاکستانی پوج ءَ بولان، ہرنائی، لجے، ھاران ءُ کلات ءِ نزیگ گور ءِ دمگاں جنگی بالگرد، ھیلی ءُ ٹینکاں گوں زوراکی کتگ چریشی ءَ بازیں بلوچ ءِ شھید ءُ زدگ بوتگ انت – بلوچانی زورانسری آوارجنی ءُ وتی زندانانی تہ ءَ آھانی کوش ءِ تہ ءَ ھم گیشی آرتگ – ریاست ءِ وتی زوراکیانی تہ ءَ گیشی آرگ بس اناگھی ءِ نہ انت بلکنہ اے پاکستان ءِ پارلیمان ءِ لوٹوک ءُ مپاد پرست پاٹیانی پرمائش ءِ برورد انت –