بالویں بالی – شُپانک

بالویں بالی

اولی بهر

نبشتہ کار: شُپانک

دی بلوچستان پوسٹ

زندمان ءِ زنگ کپتگیں اهد ءَ باریں چونیں رنگ مانشان اتگ بلے گپ کہ زمین ءُ زبان ءَ پہ کیت ، سوهویں باسک پہ سرانی بکشایگ ءَ دائم اوشتاتگ اَنت مهکمیں هسارانی دْرستاں چہ ساری سهریں دْروت شهید پیرک جان ءِ هنکین ءُ پروم ءِ تاپتگیں زید ءُ کوهیں کِیلّگاں زندگی ءُ زندمان ءِ چَکاس مدامی بلوچ ءِ تیر سُپتگیں بدن هیل وار اِنت بلے همبلانی سِدگ ءُ سنگرانی مهکم دارگ یک اوستے ءِ واهشت اِنت-

سیزده اُوسپان ءَ منی پیسل آباد ءِ مزن شهدربرجاه ءِ چکاسانی موکل کہ بوت اَنت ، دل ءَ اَت کہ بالی ءَ بہ گِنداں ، چوناها شهید پیرک ءَ دائم ءَ بالی ءِ توسیپ کتگ اَت کہ سکیں جهد کاریں سنگتے ، یکّوئی کہ کسانیں هبرے مئے دْرمیان ءَ بوت گڑا مِیجرے دپ ءَ بَالی اَت کہ چو چو من مرچان چٹ آزاد آں بالی بالوئے هرچ کاراں ساری ءَ بال کنان ءَ روت کنت ، گڑا من میجر هال کت کہ من موکلاں اگاں در اتک آں الم کایاں تئی اوتاک ءَ بالی ءَ پوه کن ، من کایاں دانکہ ودار سرجم بوت موکل بوت انت من دراتک آں دیم پہ میجر ءِ اوتاک ءَ ، شهید شهیک ءَ را من پون کت کہ من بس ءَ ایر کپتگ آں سئے چار روچ اِنت سپر ءَ ژند کتگ من شهر ءَ دارگی آں گڑا شهیک ءَ مکن کت کہ شهر ءَ مدار شپی انگت سپر کنگی اِنت داں میجر ءِ اوتاک ءَ رو ایں ، بالی کیت شپ ءَ پد ءَ باریں دست دنت یا اناں-

همے کہ بس ماں شهر ءِ سیمسراں رس ات من ودار جاهے ءَ ایر کپت آں شهیک پون کت شهیک گوں پرپٹ ءَ اتک ، دْروت ءُ دراه بات ءَ رند چاگل ءَ چہ آپ من وارت شهیک ءِ من پرپٹ ءِ هلینگ ءَ پہ سوار بوت آں کندگ گپ کنان داں ما شهر ءَ در اتک ایں کمیں سپر ءَ رند مئے پرپٹ بند بوت بزاں تیل ءِ هلاس بوت اَنت ، من کند اِت کہ اے شیهو تئی پرپٹ ءَ کدی مردم منزل ءَ آسری برتگ هاهاها ، شیهک ءَ کند اِت شپانک تئی بهت اِنت زاناں هرچ وهد تو گوں بے پرپٹ دروه ایت ، بلے مرچی مرگے گپیت نہ دروهیت تیل گون ءَ مان اِنت ، ما تیل چہ گون ءَ کش اِت پرپٹ ءَ را مان کت نوں روچ وتی گُڈی سیمسران اَت بڈگی اَت ، ما سپر کناں داں میجر ءِ اوتاک ءَ رست ایں –

میجر ءَ مارا وش اتک کت همبلیں نواز وپتگ اَت باجا ایر اِت ئِے کش ءِ واب ات شهیک ءَ جت لگتے سہ شت پاد اتک دیست ئِے من ءَ بگلا ئِے کت ما نشت ایں میجرا من ءَ جست کت چون اِنت وانگ باریں ،من دراهینت همیش اِنت کمیں وهد پشت کپتگ نوں گڈی سیمسٹر اِنت ، نواز ءَ کندگے جت ءُ دراهینت شما مپت ءَ وت ءَ زلیل کتگ گوں وانگ ءَ هاهاهاها ، داں میجرا گشت هاں اڑے من بیهالاں سنگت آیگی بوتگ اَنت ورگ تیاری کنگی اِنت ، من گشت سنگت بالی؟ میجرا پسہ دات هو تو پمن انچو مهر نہ کتگ هاهاهاها، شهیک ءَ کندگے جت ءُ گشت نورا پل شکر هلاس انت هاهاهاهاها، نواز سواسے جت ءَ کند اِت شومیں جنوزام تو چہ شهر ءَ پیداکے شکر بیارتیں گوں-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔