نبشتانک: سوشل میڈیا ءُ مئے رَوِشت
نبشتہ کار: بالاچ قادر
دی بلوچستان پوسٹ
سوشل میڈیا انچیں ٹولے کہ اشی ءِ وسیلگ ءَ سرپدی، زانت، جتاجتائیں لیکہ ءُ ھیال دیم ءَ آرگ بنت۔ مرچیگیں دؤر ءَ ارزشت دار تریں چیز اش اِنت کہ سوشل میڈیا ھما آدینک ءِ کرد ءَ پیلو کنگ ءَ اِنت کہ آئی ءِ اندر ءَ یک چاگردے ءِ سرجمیں دودمان زاھر بیت اِنت ۔ یک چاگردے ءِ مردُمانی باوستاں چہ اندازگ جنگ بیت کہ ایش کجام نپسیات، کجام ھیال، کجام لیکہ ءَ گوں بندوک اَنت پمشکا دنیا ءِ مزن ءُ دیمروئی شتگیں ملکانی نامدار تریں بنی آدم مروچی باز چار ءُ گزار ءَ پَد سوشل میڈیا ءَ نویس اَنت ءُ وتی لبزانی سنگ ءُ شاھیم ءَ یکیں ھساب ءَ دار اَنت۔
دومی نیمگ ءَ ما بیائیں بلوچ چاگرد اِنت۔ جنگے ھست، مردم مرگ ءَ اَنت،لوگ ستکگ اَنت،ھزارانی کچ ءَ ورنا در پہ در اَنت۔ گاریں چکانی واستا پیریں مات دگانی سر ءَ چیھال جنگ ءَ اَنت۔ کراچی ءِ دابیں جُلگمیں شھرے ءَ بلوچ جنکانی سر ءَ پولیس لٹّ ءُ کٹ کنت،آھاں کشّاں چیلّ کنت ءُ بندی جاہءَ بارت۔انچیں بے رھمیں دُژمنے دیم ءَ اِنت کہ آ بلوچ کنت کُش ایت،بلوچ کنت ءُ چست کنت،بلوچ کنت ءُ زُلم کنت۔ پراھی ءَ نودربرے،پیریں زالے،کماشے،شپانکے،پروفیسرے،ڈاکٹرے یا لس بنی آدمے آ یک ھساب ءَ اَنت۔
بلوچ لکّانی ھساب ءَ سوشل میڈیا ءَ کارمرز کن اَنت اگاں گوں ما دگہ کارے بیت نہ کنت بلئے اشی ءِ وسیلگ ءَ وتی آہ ءُ پریاتاں دنیا ءَ سر کُت کنیں بلئے بیا کہ ما چے کنگ ءَ ایں؟ مئے پلیّتگانی دیم گوں دُژمن ءِ بدل ءَ وتی جند ءَ اِنت۔آزمان ءَ کہ تُک جن ئے تئی وتی دیم ءَ لگّ ایت پمشکا سوشل میڈیا ءَ کہ ھرچ تُکّے جنگ بیت آ پد ءَ کئیت ءُ مئے جند ءِ دیم ءَ لچّ ایت گوں۔کالونیل مانڈسٹ ءِ دُژمن مدُام “میڑین ءُ واجھی کن ءِ پالیسی ءَ کارمرز کنت اے پالیسی دنیا ءِ درستیں بزگریں راجانی سر ءَ کارمرز کنگ بیتگ بلئے بلوچستان ءَ چہ انگریز استعمار ءِ دؤر ءَ بگر داں مرچی بیا اے پالیسی روچ پہ روچ سوبمند بئیان ءُ پیداک اِنت۔ سیاسی پارٹیاں بگر داں لبزانکی مردُماں درا درست یکے دومی ءِ گُٹ ءِ ھونان اَنت۔
ما انچیں دمکے ءَ اتکگ ءُ گّٹ بیتگیں کہ پُشت ءَ آس ءُ دیم ءَ چات اِنت۔ پُشتءَ روئے سُچ ئے دیم ءَ جُنزئے چات ءَ کپ ئے۔بّس یک راھے کہ دمک ءِ مُھریں دیوالانی پروشگ ءِ ھیلہ سازگ بہ بیت کسے گوں ھورکیں دستاں،کسّے گوں داسے ءَ،کسّے گوں مُشتے ءَ ھرکس وتی جند ءِ بھرشت ءَ مان بہ کنت ءُ اے دیوال ءَ انچیں ٹُنگے پر بہ کنت درآیگ ءِ راھے پچ بہ بیت۔ بلئے بیا کہ ما ھمے آس ءُ چات ءِ میان ءَ انچو ھئیران ءُ ھبکہ اِنت کہ دیوال ءِ بدل ءَ یکے دومی ءِ سر ءَ پْروشگ ءَ ایں۔ تو منی دامنُ ءَ دّر،من تئی آستونکاں دّراں۔ اے لئیب انچو روان اِنت۔
بائد وَ اش اَت کہ ما پنچ پنچ فیک آئی ڈی ھمے واستا جوڑ بہ کتیں کہ وتی توا رءَ بُرز تر بکنیں بلئے مرچی ھرکس پنچ آئی ڈی جوڑ کتگ ءُ نشتگ کہ کدی پلانی ءِ پوسٹ ءِ چیر ءَ شِھم ءُ الکاپیں زاھے بدیاں کجا موہ بہ رس ایت یکے ءِ ایرجنگ ءَ بندات کناں دومی نیمگ ءَ لھتیں انچیں دُژمن ساچیں مردُم اَنت کہ اشانی کار ءُ کسب سوشل میڈیا ءَ زاہ ءُ زگر اِنت۔ بگندئے اشی ءِ مُز اِش رس ایت۔اے وڑیں مردم دارگ بیتگ اَنت کہ ھرکجا کسے بلوچ ءِ گپ ءَ کنت،چاگرد ءَ وتی بھرشتے دئیگ ءَ اِنت آئی ءِ دامنُ ءَ بہ دّر اِت۔ اے وڑیں مردم زاھر ءَ آشوبی اَنت،زمین ءِ درد وار اَنت،بلوچ ءِ ھیرواہ اَنت بلئے اسل ءَ دُژمن ءِ ھما پالیسی ءِ سر ءَ کار ءَ اَنت کہ دیوال ءِ بدل ءَ سر ءَ پْروش۔پمشک ءَ انچیں ترسے کہ کس اشانی پسّو ءَ دات نہ کنت کسّ اشاں گپ کُت ھوں نکنت۔اے تھر ءِ مردُمانی مستریں مکسد ھمش اِنت مردمانی ھیالاں ڈنّ ءَ بہ کش اَنت ءُ ھرکسی نپسیات ءَ چہ آشنا بہ بنت دانکہ کّسے ھکیگّیں دردوارے آئی ءِ دیم ءَ دور کنگ ءَ دُژمن ءِ راہ ساپ بہ بیت۔ بلئے درستاں چہ گیش اے پئیمیں مردمانی مکسد اش اِنت کہ سوشل میڈیا ءَ سنجیدگیں گپّ ءُ تران ءِ بدل ءَ سبّکی ءُ زاہ ءُ ذگر بہ بیت دانکہ راستیں جیڑہ گار بہ بنت۔
دومی نیمگ ءَ لھتیں انچیں سادگیں ورناہ اَنت کہ آیانی دل ءَ بلوچ ءِ درد ھست،آھاں بلوچ ءِ جنگ،ورنایانی آوار جنگ،زالبولانی کم شرپی تورینیت۔ آ چہ اے سیاسی سسٹم ءَ یا وَ دلپروش اَنت یا چٹ بے امیت بیتگ اَنت۔ اے دراھیں جاوراں اشانی نفسیات ءِ سر ءَ انچیں اسرے دؤر داتگ کہ آ چہ اندر ءَ لھڑ ءُ جوش ورگ ءَ اَنت پمشکا اے وڑیں مردم شعوری باوست ءُ تران ءِ بدل ءَ تچک ءَ آس گراَنت۔ (اے آس گرگ ھوں جاورانی ودی کتگین اِنت)۔
اے ھما مردم اَنت کہ نا امیتی ءُ بے اوستی ءِ سوب ءَ پھک ءَ انسرتگ اَنت۔ بس وتی اندر ءَ لھڑ ورگ ءَ اَنت بلئے گراؤنڈ ءَ ھچ چیز ءَ گون نہ اَنت۔ نودربر چست بنت روانک در کئیت،دگانی سر ءَ زھرشانی بیت،اوگام ءُ چیوہ لگ اَنت بلئے ھچّ ءَ گون نہ اَنت۔اے گون نہ بوگ ءِ سوب ناامیتی ءَ ابید تُرس ھوں ھست اِنت۔ اے دور ءَ چہ تماشہ کن اَنت۔ اے تھر ءِ مردم ھوں سوشل میڈیا ءَ سنگینیں باوستانی بھر نہ اَنت۔ بلئے ھما مردم کہ جھدے ءَ گون اَنت ایشانی کار ھمایانی پُچّکاں بئیگ اِنت۔زاہ ءُ بد کنگ اِنت۔ چوشکہ اے مردم وت تماشہ چاروک اَنت پمشکا پریشاں گراؤنڈ،جاورھال ،وھد ءَ ارزشتے نہ دار اَنت بلکیں اے بسّ ھمے اوست ءَ کن اَنت کہ لئیب مئے تب ءِ ھساب ءَ بہ بیت۔ وھدے لئیب گراؤنڈ ءِ جاورھال ءِ ردبءَ چارگ ءُ کنگ بیت گڑا اشانی اندربءِ آس گیشتر زوراک بوان کنت۔ اے تھربءِ مردم ھوں سوشل میڈیابءَ مانگشتگ اَنت ۔یا پہ زانت یا پہ جزبگ بلئے اے دُژمن ءِ بدل ءَ تّک ءَ وتی دیما جن اَنت۔
دومی نیمگا ھما مردم کہ آ دُژمن ءِ ساچتگیں پندلءِ رد ءَ سوشل میڈیا ءَ ھّیراں بُستی کنگ ءَ اَنت آھانی رِپک سوبین بیان اِنت۔
اے ھساب ءَ مرچی سوشل میڈیا ءَ بچار سنگینیں باوست نیست بلکیں انچیں بزگی یے کہ ھرکس وتی پشکءَ دّران اِنت۔ کوھنیں زمانگ ءِ کسھے۔ یک ڈگارے ءِ سر ءَ شپانکے ءَ دوار کتگ ءُ آئی ءِ رَمگ ڈنّ ءِ سر ءَ وپسوک بیتگ۔ چوکہ آزمانگ ءَ تولگ سک باز بیتگ پمشکا شپانک ءَ سئے نراز داشتگ کہ پساں تولگے مہ وارت۔بزاں یک شپے تولگے رمگ ءَ مان کپیت۔تولگ کہ رمگ ءِ تہ ءَ پُتریت ءُ پسے دپ جنت گڑا پّس شور گراَنت ءُ پریات کن اَنت۔اینچوکہ شپانک ھوں گوں مکّیءَ تچان بیت نراز ھوں ھنّزار بند اَنت۔ شپانک گندیت کہ نراز پسانی دوار ءَ دور گوں تولگ ءَ مان اتکگ اَنت آ دلجم بیت کہ تولگ نی نرازاں وتی وڑا کتگ پمشکا واتر کئیت ءُ وپسیت۔ سُھب ءَ وھدے پاد کئیت داں گندیت تولگ ءِ بدل ءَ نِرازاں وتی ھمراہیں کُچک تل تل جتگ ءُ کُشتگ وھدے کہ تولگ ءَ شّریں بُزے زُرتگ ءُ شُتگ۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔